Rusiye Aqyar akimiyetiniñ Sağlıq bölügi, qızamıq aşınıñacele yedegini yapqanlarını iddia ete. Bu aqta fevral 14-ünde bölükniñ baş mütehassıs-epidemiologı Sergey Grıga bildirdi.
“Sağlıq bölügi acele aşı yedegini yaptı, ilk evelâ epidemiyağa qarşı tedbirler keçirmek içün. Şimdilik qızamıq aşılavı içün üc biñ doza satın alınmaqta. Bundan ğayrı, 47 biñ doza Aqyarğa aprelde ketirelecek ve kütleviy aşılav yapılacaq”,- dep, qayd etti o.
2018 senesiniñ soñundan şimdigece Aqyarda 5 qızamıq çıqarması (3 büyük, 2 bala) qayd etildi.
Evel bildirile edi ki, yılnıñ başından Qırımda 12 qızamıq çıqarması belgilendi.
2018 senesi noyabrde Aqyarda qızamıq adisesi qayd etildi.
2018 senesi ilhaq etilgen Qırımnıñ Aqmescit, Kezlev ve Saq rayonlarında qızamıq çıqarması qayd etile edi. Rospotrebnadzor 17 adiseni tasdıqladı.
2018 senesi Bütün dünya sağlıq saqlav teşkilâtı Avropada qızamıq adisesiniñ rekordlı çıqaruv sayısı belgiledi. İlk altı ay devamında 41 biñ adamdan çoq qızamıq çıqardı, bu - keçken 10 yılnıñ eryıllıq köstergiçlerinden çoq.
Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.
