Link açıqlığı

Saatnıñ esas haberi

Aqyarda eki qızamıq adisesi qayd etildi


Keçken afta Aqyarda qızamıq adisesi qayd etildi. Bu aqta Aqyar boyunca İstimalcılarnıñ aq-uquqlarını qorçalav ve insan amanlığı saasında Rusiye federal nezaret hızmetiniñ (Rospotrebnadzor) mutehassıs-eksperti Svetlana Solânikovanıñ sözlerinden yerli haberciler bildire.

“Keçken afta ana ve balada eki qızamıq adisesi qayd etildi, ekisiniñ de qızamıq aşısı yoq edi”, - “İKS” telekanalınıñ efirinde dedi o.

Aqyar Sağlıq saqlav departamentiniñ müdir muavini Mihail Malişevskiyniñ sözlerinden “Primeçaniye” Aqyar matbuatı, hastalanğan bala oquğan №26 mektepte, onen qonuşqan balalarn aşılaylar.

“Bu sınıfta karantin ilân etildi, hastanen qonuşqan bütün balalarğa profilaktik aşılav yapılacaq. Cedveller tizilgen, iş yapıla”, - dedi o.

Aqyar sağlıq saqlav departamentiniñ boş epidemiologı Sergey Grıga, şeerde qızamıq epidemiyası olmağanını bildirdi.

2018 senesi Bütün dünya sağlıq saqlav teşkilâtı Avropada qızamıq adisesiniñ rekordlı çıqaruv sayısı belgiledi. İlk altı ay devamında 41 biñ adamdan çoq qızamıq çıqardı, bu - keçken 10 yılnıñ eryıllıq köstergiçlerinden çoq. Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.

XS
SM
MD
LG