Aqyar şeer başı Mihail Razvojayev emir çıqardı ki, Aqyarğa kirgen episi 14 künlük karantinni kütmeli.
"Başqa bölgelerden, hususan Moskovadan, Moskova vilâyetinden ve Sankt-Peterburgdan kelgen adamlarnıñ episine nezaret noqtalarında anketa berile. Olarğa eki variant teklif etile: Aqyarda meskenler olsa - özüni tecrit etmek, olmasa - observatorğa barmaq", - dedi Aqyar akimiyetiniñ memurı Aleksey Krasnokutskiy.
Qırımda aprelniñ 10-nda daa eki koronavirus hastası qayd etildi. Qırımlılar Tailanddan qayttı.
Aprelniñ 9-na qadar Qırımda 26 yañı koronavirus hastası qayd etildi. Olardan 20-si ketirildi, altısı üç qorantadan yerli ola. Yedi insan tüzelgen soñ yuqunç hastahanesinden çıqarıldı. Aqyarda beş koronavirus hastası aqqında haber etilgen edi, dördü tüzeldi. Aprelniñ 9-nda Aqyarda daa bir COVID-19 hastası aqqında bildirdiler. Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
