Aqmescitniñ Kyiv rayon mahkemesi “Veciye Kaşka davası”nda qabaatlanğanlarnı apis müddetini eki ayğa uzattı. Bekir Degermenci, Asan Çapuh, Kazim Ametov ve Ruslan Trubaç noyabr 15-nece SİZOda qalacaq. Tahqiqat rivayetine köre, faalciler Turkiye vatandaşından aqsız yerde para talap etti. Olarnıñ rivayetine köre ise, qabaatlav uydurılğan, tevqifleri ise siyasiy sebepleri bar ve olarnıñ cemaatçılıq faaliyetinen bağlı. Tutulğanlarnıñ dördü de, FSBve rusiye quvetçileri tarafından taqip etilgen vatandaşlarına faal yardım ete edi.
Rusiye quvetçileri faalcilerni Aqmescitte keçken yılı noyabrniñ soñunda tuttı. Tutulğanlarnıñ aytqanına köre, Turkiye vatandaşı Yusuf Aytan, 83 yaşlı qırımtatar milliy areketiniñ iştirakçisi Veciye Kaşkadan yalannen 7 biñ dollar aldı. Şu künü ise, o aqçalarnı qaytarmaq kerek edi. Faalcilerniñ tutulıp alması vaqtında qadın yaramadı ve hastahane yolunda elâk oldı.
Mavile Degermenci, onıñ babası Bekir Degermenci apishanede ne şartlarında tutulğanı aqqında aytıp berdi.
- Sağlıq problemalarına baqmadan, babamnıñ keyfi güzel. O er daim selâm ete, onı unutmayıp, qol tutqanlarğa daima minnetdarlıq bildire. Onıñ sağlığı yahşı degil. Endi o ilâcsız yaşap olamay, amma oña kerek ilâclar tek Ukrainada bar. Mında satın alınğan soylarını yollasaq, SİZOda olarnı tutıp alalar ve: böyle soylarını satın almañız, Rusiye ilâclarınıñ keyfiyeti pek alçaq olğanını özüñiz de bilesiñiz, dep aytalar. Buña baqmadan, yollamağa çare tapamız. Babamnıñ qan basımı pek yüksek, boynunda balaban çibanlar çıqtı, olarnı kesip almaq kerek. Amma olarnı şimdi kesip alsalar, SİZOdaki pislikte yaralarnıñ alı ne olacağı belli degil. O melemler qullana, ağrığa dayanmağa tırışpa. Advokattan bilgenimiz kibi, o çoqusı alda odada bir özü ola - tibbiyet-sanitar odasında.
Rusiye mahkemesiniñ apis müddetini uzatmaq qararı - beklenilgen bir şey dep ayta Mavile Degermenci.
- Advokat, yarın müddet uzatması aqqında mahkeme olacaq dep aytsa, biz neticesi ne olacağını endi tahmin etemiz. Amma ağamnı yibergen künü de, biz onı daa tutacaqlar dep keyfinen mahkemege kete edik, amma onı ev tevfiqine yiberdiler, eki yıl keçken soñ olsa da. Mücizege işanç ep bir göñlümizde yaşay, yürekte biz inanamız. Biz dindar adammız, sağlıq içün dua etemiz, bütün halqımıznıñ azat etilmesi içün. Tek bizim qorantamız degil - çoq aileler qıynaldı. Tahqiqat, ğaliba, bite, yaqın vaqıtta davanı mahkemege yollacaqlar.
Jurnalist Taras İbragimov, mahkeme oturışlarıñ başlanacağını yaqın vaqıtta beklemek mümkün olğanınen razı.
- Dört iştiraksiden üçü - esli-başlı adamlar, episiniñ sağlıq problemaları bar. Asan Çapuh insultqa yaqın alda, amma onı ep bir SİZOda tutalar. Men bellesem, bu - tahqiqat çerçivesinde apis müddetiniñ soñki uzatılması. Advokatlar noyabr ayında mahkeme başlacağını daa evel qayd etken edi. Yusuf Aytanğa barğanda, bu adam şimdilik Qırımda buluna ve mahkemede olacaq, sorğuğa çekilecek. O - bu davanıñ esas şahıslarıdan birisi. Advokat Nikolay Polozov mustaqil tahqiqni keçire ve Yusuf Aytan aqqında bir de bir malümat berecek, faaliyetini aydınlatacaq vesiqalar talabınen Turkiyege sorav yolladı.
Taras İbragimov, Asan Çapuh, onı ev tevqifine yibermeseler ya da şeer hastahanesinde kerekli tibbiy yardım etmeseler, sentâbr 15-inden açlıq ilân etecegi aqqında ayttı, dep qayd ete.
- Men bellesem, imayecileri buña qol tutmay. Asan Çapuh endi bir qaç kere açlıq ilân etecegi aqqında ayta edi, amma er sefer advokatı bunı yapmamağa qandıra edi. Bu esli-başlı adam, onıñ sıfatı kerçekten de acınıqlı. Men mahkemede bulunğan edim - onıñ lafları yaramay eşitile. Olar “akvarium”de (mahkemelengenler içün şeffaf qutu - Q.A.) otura ediler, onıñ laqırdısı añlaşılmağan, sesi solğan ve adam, sanki dersiñ, mında degil, öz aleminde yaşay.
Rusiye advokatı Nikolay Polozov, mustaqil tahqiqatniñ yavaş keçirilgenine aytına.
- Devlet organları Veciye Kaşka ölüminiñ sebeplerini kerçekten açıqlamağa istese edi, bu şeylerniñ epsini tezce yapmaq mümkün olur edi. Mustaqil tahqiqatniñ ilerlevi bar, amma men şimdilik onı açıqlamaycam, çünki rusiye memurları delillerni yoq etmege tırışmaq mümkün. Yusuf Aytanğa bağlı cevap Turkiyeden daa kelmedi. Bundan ğayrı, Veciye Kaşka ölüminden bir qaç kün evel tedaviylev alğan tibbiyet merkezinden vesiqalarnı bekleyim. Cinayet davasınıñ açıluvınıñ red etmek qararını temyiz etmek içün, alternativ mahkeme-tibbiyet ekspertizasını keçirmek kerek. Bunıñ içün, ekspertlerge olduqça tolu malümat bermek lâzim. Şimdilik ekspertler, Rusiye gvardiyasınıñ areketlerini, qadınnıñ apansızdan sağlığı fenalaşqanınen bağlap olamaylar.
Nikolay Polozov, rahmetli Veciye Kaşkanıñ üç qabırğası qırıq edi, amma ekspertiza bu - reanimatsion areketleriniñ neticesinde oldı dep aytqanını qayd ete.
- Amma onıñ bedeninde, bu añlatuvğa uymağan ve ekspertler tarafından tasvir etilmegen, başqa zararlanmalar bar. Mında başqa vaziyet çıqa bile, amma şimdi men olar aqqında aytıp olamayım. İşte, şimdilik er şey aqiqat qıdırılmasını qıyınlaştırmaq içün yapıla.
(Metinni Vladislav Lentsev azırladı)
