Rusiye FSBsi tarafından terrorizmge yardım etkeninden şübheli sayılıp tutulğan eki Qırım sakininden biri eki ayğa apiske alındı. Bu aqta cuma künü Rusiye kontrolindeki Aqmescitniñ Kiyev rayon mahkemesiniñ saytında haber etile.
«Tahqiqat elde etken malümatqa köre, A. «cihadqa» – «kâfirlerge», yani diger din vekillerine qarşı «qudsiy cenkke» davet etken islâmnıñ eñ agressiv şeklini küte, zorbalıqnı ve terrorizm mefküresini doğru sayıp, «Hayyat Tahrir aş-Şam» azası ile bağ qurdı. Soñra 2020 senesi devamında «Hayyat Tahrir aş-Şam» içün maddiy yardım olaraq para toplamaq içün qullanılğan cep telefonına qayd etilgen Qiwi-cüzdanına bir çoq sefer para yolladı», – dep aytıla haberde.
Mahkemeniñ malümatına köre, qabaatlanğan kişi akimiyet organlarına vaqtında haber etmedi ya da «Hayyat Tahrir aş-Şam» faaliyetine yol bermemek içün başqa bir şey yapmadı.
«A., Rusiye Ceza kodeksiniñ 205.1 maddesiniñ 1.1 qısmına istinaden cemaat telükesizligine qarşı ağır cinayet yapqanından şübheli sayıla, bu cinayet içün ömür boyu qadar apis cezası berilmesi mümkün», – dep aytıla haberde.
Rusiye mahkemesi, şübhelini 2021 senesi iyünniñ 8-ne qadar apiske almağa qarar berdi. İşbu qarar istinaf esasında şikâyet etile bile.
Rusiye FSBsi, Aqmescitniñ tasil müessisesinde terror ücümini azırlağan 1992 ve 1999 senesi doğma eki vatandaş tutulğanı aqqında bildirdi.
«Hayyat Tahrir aş-Şam» 2017 senesi yanvar ayında quruldı ve «Cebhat an-Nusra» aydutları tarafından idare etile. Teşkilâtqa tahminen 20 biñ aydut kire, olar Suriyeniñ İdlib şeerinde terror faaliyetinen oğraşa.
2020 senesi Rusiye Yuqarı mahkemesi Rusiye baş prokurorı İgor Krasnovnıñ davasını qanaatlendirip, «Hayyat Tahrir aş-Şamnı» terror teşkilâtı dep tanıdı.
