Aqmescitteki ekinci «Hizb ut-Tahrir davasınıñ» mabüsi İzzet Abdullayev SİZOda qaldırıldı, imayesiniñ istinaf şikâyeti red etildi. Bu aqta «Qırım birdemligi» advokat Marlen Halikovnıñ malümatına esaslanıp bildire.
Abdullayev 2020 senesi dekabrniñ 15-ne qadar apiste qalacaq. Mahkeme oturışuvı Aqmescit tahqiqat izolâtorı ile video konferentsiya vastasınen keçirildi.
Keçken oturışuvda İzzet Abdullayev qırımtatar tiline çevirecek terciman hızmetlerinden faydalanmaq aqqı aqqında muracaat etti, faqat mahkeme muracaatını red etip, «Hizb ut-Tahrir davasınıñ» mabüsi «Sovetler Birliginde doğdı, rus tilinde tasil aldı, uzun zamandır Qırımda yaşay», dep qayd etti.
Bir kün evelsi Aqmescitteki ekinci «Hizb ut-Tahrir davasınıñ» eki mabüsi Vladlen Abdulkadırov ve Rustem Seythalilov da dekabrniñ 15-ne qadar SİZOda qaldırıldı.
Aqmescitteki ekinci «Hizb ut-Tahrir davası» mabüsleriniñ advokatları Qırımdaki Rusiye FSBsiniñ tahqiqatı tarafından «ciddiy bozuv» aqqında bildire.
Aqmescitteki ekinci «Hizb ut-Tahrir davası» boyunca ilk tahqiqat yekünlendi, bundan soñ tutulğanlar beşer kişilik beş gruppağa bölündi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
