Aqmescitteki ekinci «Hizb ut-Tahrir davasınıñ» eki mabüsi Vladlen Abdulkadırov ve Rustem Seythalilov SİZOda qaldırıldı. Bu qararnı advokatlarnıñ apiste tutuv müddetleriniñ uzatıluvına qarşı bergen istinaf şikâyetlerini baqqan Rusiyeniñ Soçi Üçünci İstinaf mahkemesi qabul etti. Bu aqta «Qırım birdemligi» advokatlar Yevgeniy Belousov, Marlen Halikov ve Emil Kurbedinovnıñ malümatına esaslanıp bildire.
Qırımtatarlar 2020 senesi dekabrniñ 15-ne qadar apiste qalacaq. Oktâbrniñ 2-nde mahkeme mahkeme İzzet Abdullayevni apiste tutuv müddetiniñ uzatılmasına qarşı şikâyetni baqacaq.
İmaye tarafı delil kösterip, mabüslerge qarşı Dördünci Jeneva şartnamesi qullanılmalı, dep qayd etti. Advokatlarnıñ bildirgenine köre, SİZOda tutuv – vatandaş faalligi ve «qırımtatar musulmanlarına qarşı açılğan sahte davalarda» tahqiqat organlarınen iş birligi yapmağa razı olmağan müvekkilerine basqı usulıdır.
Oturışuvda dava mabüsleri muracaat etti, hususan, İzzet Abdullayev terciman hızmetlerinden faydalanmaq aqqı aqqında rica etti. Mahkeme mesleat odasına ketip, davanı başqa künge qaldırmaq kerek, dep qarar berdi. Qadı, Qırımdaki FSB idaresine muracaat etip, terciman ilk tahqiqatta iştirak etip etmegeni aqqında soraycaq. Abdullayevniñ sıñırlav tedbirini belgilev oturışuvı oktâbrniñ 2-ne qaldırıldı.
Aqmescitteki ekinci «Hizb ut-Tahrir davası» mabüsleriniñ advokatları Qırımdaki Rusiye FSBsiniñ tahqiqatı tarafından «ciddiy bozuv» aqqında bildire.
Aqmescitteki ekinci «Hizb ut-Tahrir davası» boyunca ilk tahqiqat yekünlendi, bundan soñ tutulğanlar beşer kişilik beş gruppağa bölündi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
