Cumaaqşamı künü, oktâbrniñ 22-nde, Rusiye kontrolindeki Aqmescitniñ Kiyev rayon mahkemesi FSB üyken tahqiqatçısı Sergey Mahnevniñ muracaatını qısmen qanaatlendirip, Aqmescitteki ekinci «Hizb ut-Tahrir davasınıñ» daa bir mabüsi Enver Ametovnıñ dava malümatını ögrenüv müddetini noyabrniñ 20-ne qadar qısqarttı. Ametov, advokatı Emil Kurbedinovğa «tahqiqat izolâtorındaki insaniyetsiz şaraitler ve bu sebepten peyda olğan hastalar» aqqında haber etti.
«SİZO memuriyeti şikâyetlerge qulaq asmay, acele yardım çağırmay, hastanıñ sıcağı çıqsa, bir şey yapılmay», – dep bildire Kurbedinovnıñ aytqanlarını «Qırım birdemligi».
Bundan ğayrı qayd etilgenine köre, tahqiqat tedbirleriniñ cedveli çekiştire.
«Aftada bir künü olarğa tahqiqat izolâtorında özüni baqmağa imkân berile, aftada 6 kün olarnı FSBge malümat ögrenmesi içün alıp keteler. Saba 5-te turdıq, gece 10-11-de kamerağa qayttıq. Bu cedvel boldurta, mahkeme buña qulaq asmalı, dep tüşünem», – dep qoştı advokat.
SİZO memuriyeti bu malümatnı şimdilik izaatlamadı.
Rusiye kontrolindeki Aqmescitniñ Kiyev rayon mahkemesi oktâbrniñ 16-nda Aqmescitniñ ekinci «Hizb ut-Tahrir davasınıñ» mabüsleri Şaban Umerov, Remzi Bekirov ve Farhod Bazarovnıñ dava malümatlarını baquv müddetini sıñırladı. Oktâbrniñ 21-nde – Aqmescitteki ekinci «Hizb ut-Tahrir davasınıñ» mabüsleri Yaşar Muyedinov ve Rustem Şeyhaliyev içün.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
