Aqmescitteki ekinci «Hizb ut-Tahrir davasınıñ» mabüsleri Tofik Abdulgaziyev, Bilâl Adilov, Vladlen Abdulkadırov, Mecit Abdurahmanov ve İzzet Abdullayev 2021 senesi dekabrniñ 19-na qadar apiste qalacaq. Bu aqta avgustnıñ 31-nde Rostov-na-Donu Cenübiy okrugınıñ arbiy mahkemesi oturışuvında belli oldı, dep haber ete «Qırım birdemligi» cemaat birleşmesi.
Mahkemede prokuror mabüslerniñ «cinayet ile alâqaları» olğanına ve mabüslerniñ «apiste tutulması içün mania olacaq hastalıqları olmağanına» dair deliller ve şaatlıqlar bar, dep bildirdi.
«Vladlen Abdulkadırov, prokuror mabüslerniñ sağlığı yerinde olğanını isbatlağan bir vesiqa bermedi, ve covid talilinden ğayrı, başqa bir talil yapılmadı, dep qayd etti. Onıñ bildirgenine köre, devlet qabaatlayıcısı mabüsler saqlanacağını ya da gizli şaatlarnıñ ayatları içün telükeli ola bilecegini isbatlaycaq vesiqalarnı ilâve etmedi. Diger advokat ve mabüsler onıñ aytqanlarına qoltuttı», – dep aytıla haberde.
Daa evel berilgen malümatqa köre, Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davası» mabüsleriniñ apiste qaluv müddetini 2021 senesi dekabrniñ 16-na qadar uzattı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
