Qırımnıñ Rusiye ükümetiniñ milletlerara munasebetler devlet komitetiniñ yolbaşçısı Ayder Tippa Aqmescitteki Cuma Cami qurucılığı ne alda olğanını tarif etti. Onıñ aytqanına köre, bu leyhada iş bitirüv müddetlerini deñiştirmege planlaştırmaylar.
Bu aqta o, «Krımskaya gazeta» neşirine bergen intervyüsında ayttı.
«Cami İçtimaiy-medeniy leyhalarğa qoltutuv fondunıñ parasına, yani metsenatlarnıñ parasına qurulı. Şimdi baş tış hızmetçisi, «SpetsStroyKrım» şirketi, elektrik qurğusı ve abadanlaştıruv añlaşmaları tizildi. Bundan ğayrı, eñ yaqın vaqıtta qora quruluvı añlaşması tizilmeli, yeşillendirüvni yapacaq şirket meselesi baqıla», – dep bildirdi o.
Onıñ malümatına köre, camide elektrik ve gaz hatları yapıldı.
«Qırım naqliyat nazirligi tehnik vazife yapa, cami rayonında areket yolaqlarınıñ dörtke qadar arttırılması planlaştırıla. Üstkeçit quruluvı, duraq yeriniñ ve trolleybus yolaqlarınıñ deñiştirilüvi, cayav keçitiniñ yapıluvı planlaştırıla», – dep ayttı qırımlı memur.
Tippa, «Aqmescitte Cuma Cami qurucılığınıñ vaqtını deñiştecek bir qarar alınmadı», dep işandırdı.
Bu yıl Rusiye prezidenti Vladimir Putin Rusiye ve onıñ kontroli altında olğan Qırım akimiyetine Aqmescitteki Cuma Cami qurucılığını bitirmek içün «kerekli yardımda bulunmağa» emir etti. Emir vesiqası mayısnıñ 18-nde – qırımtatar sürgünliginiñ yılında – Kreml saytında derc etildi.
Vesiqağa köre, cami qurucılığını bitirüv mesüliyeti Qırımnıñ Rusiye yolbaşçısı Sergey Aksenov ve Rusiye baş nazirini Mihail Mişustinge aittir. Bu meseleni memurlar 2021 senesi oktâbrniñ 1-ne qadar baqmalı, bundan soñ Rusiye prezidenti ögünde maruzalarını taqdim etmeli. Lâkin böyle bir maruza aqqında malümat berilmedi.
«Putinniñ imic leyhası»: Aqmescitteki Cuma Cami (fotoresimler)
Rusiye akimiyeti Aqmescitteki yañı Cuma Camini 2019 senesi aprelniñ 21-nde açmağa planlaştırğan edi – Rusiye prezidentiniñ Qırımnıñ sürgün etilgen halqlarnıñ reabilitatsiya buyruğını imzalamasınıñ beşinci yılında. Daa soñra yañı kün aytıldı – 2020 senesi aprelniñ 21-i.
Leyhağa köre, Aqmescitteki Cuma Cami 5,7 biñ metr kârelik olıp, 2,6 biñ insannı sığdıracaq. İnşaat eki qısımdan ibaret – qubbeli esas bina ve kolonnalı ve abdesthaneli iç azbar. Cami qurucılığı 2016 senesi oktâbr ayında başladı, onı 2019 senesiniñ soñunda bitirmege planlaştırıla.