Rusiye Federatsiyasınıñ kontroli altındaki Aqmescitniñ Kiyev rayon mahkemesiniñ binası ögünde Rusiye quvetçileri tutqan insanlarnıñ sayısı 34 oldı, dep haber ete «Qırım birdemligi» cemaat birleşmesi.
Berilgen malümatqa köre, yanvarniñ 25-nde saba faaller Aqmescitniñ Kiyev rayon mahkemesi ögünde toplaşıp, tünevin Rusiye akimiyeti tarafından «terrorizmde» ve «Ukrayına ile bağları» olğanında şübheli sayılıp tutulğan altı qırımtatarına qoltutmağa istedi. Soñra Rusiye mahkemesiniñ binasına Rosgvardiya maşinası, eki qoyulaştırılğan avtobus, Rusiye polisi keldi, faaller kütleviy şekilde tutuldı.
«Qırım birdemligi» malümatına köre, al-azırda tutulğanlar: Sulimanov Rizvan Dilâveroviç, Seitablayev Seydamet Mustafayeviç, Asanov Muslim Şevketoviç, Osmanov Sergey Asanoviç, Ablâlimov Kazim Rasimoviç, Kurtnezirov Enver Muratoviç, Zekerâyev Abdulmacit Aydaroviç, Aciumerov Abdulaziz Abduromanoviç, Menkiyamov Şevket Nasıroviç, Zekerâyev Asan Rasimoviç, Zekerâyev Ayder Abdulmecitoviç, Useinov Yusup Yunusoviç, Memetov İsmet Nejdetoviç, Kürkçi Rustem Umaroviç, Seydametov Seythalil Refatoviç, İbraimov Kulamet Enveroviç, Belâlov Ruslan (saqat), Abdulkarimov Eskander Şevketoviç, Temirgaziyev Settar Kemaloviç, Paralamov Reşat Rasimoviç, Kurtumerov Şevket Eyupoviç, İbragimov Dilâver Serveroviç, Yagyayev Yagya Asanoviç, Useinov Server Nazimoviç, Memetov Server Smedlâyeviç, İsmailov Lemar Aliyeviç, Ametov Amet Narimanoviç, Jalilov Midat Muradoviç, Umerov Arsen Bilâloviç, Umerov Ruslan Ayderoviç, Mecitov Nariman Şevketoviç, İslâmov Remzi Tairoviç, Abdulgaziyev Amar Tofikoviç, Seydametov Sabri Fevziyeviç.
Yanvarniñ 25-nde Rusiye kontrolindeki Aqmescitniñ Kiyev rayon mahkemesi Ekrem Kroş, Ayder Asanov, Refat Seydametov, Osman Abdurazakov, Leman Zekiryayev ve Halil Mambetovnı 2023 senesi martnıñ 24-ne qadar apiske aldı.
Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.
Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.
Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.
Qırımnıñ işğal yolbaşçısı Sergey Aksenov qırımtatarlarnıñ evlerinde keçirilgen tintüvlerni izaatlap, quvetçiler «Ukrayına ile alâqalarda» qabaatlanğan altı kişini yaqalağanını bildirdi.
Ukrayına prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayına vatandaşlarınıñ tutuluvını takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
