Link açıqlığı

Saatnıñ esas haberi

Aqmescitte tevqif etilgen faal Nariman Celâl eñ yaramay şaraitte tutula – advokat


Nariman Celâl
Nariman Celâl

Aqmescit civarındaki "gaz borusında diversiya yapqanından" şübheli sayılıp apiske alınğan üç mabüsniñ arasında en yaramay şaraitte qırımtatar faali Narimal Celâl tutula, dep haber ete advokat Safiye Şabanova.

O, bu davanıñ daa bir mabüsi ve imayesi altında olğan Aziz Ahtemovnıñ sözlerine atfı ete.

Onıñ malümatına köre, Ahtemov, Nariman Celâl mahsus blokata tutulğanını ve kamerada pek dımlı olğanını aytıp bergen. Onen kamerada oturğanlardan Celâl tutulğan kamera SİZO-daki eñ yaramay kamera kibi sayılğanını eşitken.

Aziz Ahtemov öz kamerasınıñ şaraitine şikâyet etmey. O altı kişi içün kamerada otura eken, amma şimdi anda yedi adam buluna. Kamerada buzdolap ve televizor bar, daa kitaplar oqumaq mümkün.

Aqmescitte tevqif etilgen qırımtatar faali Nariman Celâl SİZO-nıñ mahsus blokunda tutula. Anda o atta diger mabüslerden uzaqlaştırılğan. Bunı Celâlnıñ advokatı Nikolay Polozov haber etti.

Rusiye quvetçileri Qırımda «gaz borusında diversiya yapqanından» şübheli sayılıp apiske alınğan qırımtatar faali Nariman Celâlğa qarşı qabaatlavnı sertleştirildi.

Anğara köyündeki «gaz borusında diversiya» davası

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

XS
SM
MD
LG