Kreml nezaretindeki Qırımnıñ Yuqarı mahkemesi qırımtatar faali, bloger Nariman Memedeminovnıñ imayesi bergen şikâyet arizasını red etip, onı SİZOda qaldırmağa qarar aldı. Bu aqta Qırım.Aqiqat mühbiri haber ete.
Böylece, terrorizm teşviqatında qabaatlanğan Memedeminov oktâbrniñ 17-ne qadar izolâtorda bulunacaq.
«Nariman soñki sözüni aytıp, qırımtatarı, musulman, cemaat faali ve jurnalist olğanını ve şu sebepten FSB nişanı olğanını, yalıñız şu sebepten de taqip etilgenini qayd etti», – dep tarif etti advokat Emil Kürbedinov.
Mahkeme dava malümatlarında böyle qarar olmağanına baqmadan, qapalı şekilde keçirildi. Memedeminov SİZOdan qurulğan video bağı vastasınen iştirak etti. O, açıq mahkeme olmasını rica etti, amma mahkeme izin bermedi. Soñra imaye qadı ve prokurornı çetleştirmege talap etti. Qadı Aleksey Posledov bunı da red etti.
«Narimannıñ fikirince, mahkeme, onı mahkemege ya da advokatnı SİZOğa ketirmeyip, onıñ imaye aqlarını bozdı», – dep añlaşttı Kürbedinov.
Martnıñ 22-nde Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
