Aqmescitte Rusiye kontrolindeki Kiyev rayon mahkemesiniñ binası ögünde Rusiye quvetçileri qırımtatar faalini tuttı. Videonı «Qırım birdemligi» cemaat birleşmesi derc etti.
Körüne ki, faal qırımlı musulmanlarğa qoltutmağa kelgen insanlarnı videoğa çıqardı. Bundan soñ onı Rusiye quvetçileriniñ avtobusına mindirgenler.
Aqmescitniñ Kiyev rayon mahkemesi ögünde başta dört kişi tutuldı. İnsanlarnı tutıp almağa devam eteler.
Yanvarniñ 25-nde saba 9-da Aqmescitte «Ukrayına ile bağları» olğanından tutulğan qırımlı musulmanlarnıñ sıñırlav tedbirleri belgilenmekte.
Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.
Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.
Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.
Qırımnıñ işğal yolbaşçısı Sergey Aksenov qırımtatarlarnıñ evlerinde keçirilgen tintüvlerni izaatlap, quvetçiler «Ukrayına ile alâqalarda» qabaatlanğan altı kişini yaqalağanını bildirdi.
Ukrayına prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayına vatandaşlarınıñ tutuluvını takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
