Rusiye kontrolindeki Aqmescit Kiyev rayon mahkemesiniñ «Qırım birdemliginiñ» faalleri Lutfiye Zudiyeva ve Mümine Saliyevanıñ memuriy davaları boyunca oturışuvı bugünge daa keç bir saatqa qaldırıldı. Bu aqta aq qorçalayıcılarnıñ advokatlarına mahkeme yazıhanesi haber etti, dep bildire Qırım.Aqiqat mühbiri.
Mahkeme Saliyevanıñ davasını saat 12-de ve Zudiyevanıñ davasını saat 14-te baqacaq.
«Mence, esnas standart olacaq. Tünevinki tutuvlarda körgenimiz kibi, quvetçilerniñ usulları tek qadınlarnıñ yüreklerinde degil, aqaylarınıñ yüreklerinde de qorqu doğurmaqtan ibaret», – dep izaatladı mahkemeniñ başqa vaqıtqa qaldırıluvını advokat Lilâ Gemeci.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Al-azırda Qırım ve qomşu Rusiyeniñ müessiseleri bir de bir izaat bermediler.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
