Qırımda qırımtatar faalleri özüni izolâtsiya etüv rejimi sebebinden yataqhanelerde qapalı qalğan çetel studentleri içün iftar yaptı.
Aqmescit qavelerinden birinde iftar ögüne pilâv «çıqarılıp» dağıtıldı. Bu aqta teşebbüs teşkilâtçısı Abdulla Yakubov Qırım.Aqiqat mühbirine tarif etti.
«Bu qavede eki yıldan berli çalışamız ve esas müşterilerimiz – Aqmescitniñ tren vokzalı rayonındaki tibbiy universitet studentleridir. Arap memleketlerinden, Orta Asiyadan, İndistandan. Keçken yılları studentler içün camilerden iftar yaptıq. Aqmescitte studentler davetimiz boyunca belli camilerge kele edi ve biz aş pişire edik, Ramazan ayında sıylağan edik, kelgen er keske aş bere edik», – dep ayttı faal.
Onıñ qayd etkenine köre, «al-azırda COVID-19 pandemiyası vaziyetinde kirsetilgen karantin tedbirleri sebebinden camiler qapalı ve biz, ne yazıq ki, cemaat iftarlarını yapıp olamaymız».
«Şunıñ içün böyle ğaye peyda oldı – bu zor vaqıtta balalarnı quvandırmaq. Al-azırda areketleri sıñırlana, olar yataqhanede qalalar ve az çıqalar. Evlerine de ketmediler. Qavemizge yaqın yaşaylar, şunıñ içün aş pişirip, olarğa bermege istedik», – dep tarif etti Yakubov.
İftar – Ramazan ayında aqşam yemegidir. Aqşam namazından soñ yapıla.
İşğal etilgen Aqyarda aprelniñ 27-nde beş yañı koronavirus hastası qayd etildi. Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. Aqyarda, soñki malümatqa köre, 31 COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
