Aqmescitte noyabrniñ 1-nde Rusiye kontrolindeki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davası» oturışuvına diñleyici olaraq kelgen insanlarnı tuttı. Bugün bu dava mabüslerine çıqarılğan ükümge qarşı istinaf şikâyetiniñ baqılması planlaştırıla.
«Qırım birdemligi» mühbiri adise yerinden canlı yayın yaptı. Onıñ malümatına köre, 7 qadın ve 10 er adam tutuldı. Quvetçiler insanlarnı polis avtobusına mindirip, ilk olaraq merkeziy rayon polis bölügine yol aldılar.
Quvetçileri yapqanlarını şimdilik tefsir etmey. İnsanlar şaşıp qaldı, bir şey bozmadılar, maska taqıp, mesafeni qorudılar, dep aytalar.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Qırımdaki mahkeme qırımtatar faallerine qarşı memuriy qararlar çıqardı. Para cezalarınıñ umumiy miqdarı 170 biñ ruble oldı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
