Rusiye nezaretinde olğan Aqmescitniñ Merkeziy rayon mahkemesi oktâbrniñ 11-nde mahkeme binası ögünde tutulğan qırımtatar faalleri Dilâver Memetov ve Reşat Paralamovğa 20 ve 10 biñ ruble para cezasını berdi.
Bunıñ aqqında Qırım.Aqiqatqa "Qırım birdemligi" cemaat birleşmesi haber etti.
Berilgen malümatqa köre, qadı Paralamovnıñ davası boyunca qarar çıqarığanda faalniñ 8 muracaatını red etken ve esnasqa advokatnıñ qatılmasına izin bermegen.
"İmayecilerniñ esnasta iştiragine izin ne içün berilmegenini añlamadım. Qadı, olarnıñ uquq tasili olmağanını ayttı, men bu aqlarımnı qorçalap olamağanlarınıñ sebebi olmağanını bildirdim", - dedi Paralamov.
Qadı Dilâver Memetovnıñ da aman-aman bütün muracaatlarını red etken.
"Prokurornıñ mahkeme oturışına celp etilmesi, tercimannıñ çağırılması, imayecilerniñ iştiragina izin berilmesi, mahkeme oturışınıñ audio-video qaydı temin etilmesi, oturışnıñ protokolı tizilmesi, haber vastalarıñ kirsetilmesi, şaatlarnıñ iştirak etmesi aqqında bir sıra muracaat berdim. Doquz muracaattan tercimannıñ çağırılmasından ğayrı episi red etildi", – dedi Memetov.
Aqmescitteki Rusiye İç işler nazirligi idaresiniñ «Merkeziy» üçünci polis bölügi ögünde eñ az beş kişi tutuldı, olarğa qarşı Rusiye Memuriy uquq bozuvları kodeksiniñ 20.2 maddesiniñ 1-inci qısmına istinaden memuriy protokollar tizildi.
Daa evel berilgen malümatqa köre, Aqmescitte Qurmandaki «Hizb ut-Tahrir davasınıñ» ükmüne qarşı istinaf baqılacaq olğan mahkeme binası ögünde Rusiye quvetçileri 15 qırımtatarını tuttı.
Bundan evel mahkeme ögünde bir qaç insannıñ tutulğanı belli oldı.
Rusiye kontrolindeki Qırım uquq qoruyıcıları bugün Aqmescitte olğan kütleviy tutuvlar aqqında bildirmey ve tefsir etmey.
