Bağçasaray rayonınıñ sakini Aleksandr Sizikov aprelniñ 24-nde Aqmescitniñ merkeziy meydanında qırımtatarlar ve musulmanlar, hususan Edem Smailovnıñ, apiske alınmasına qarşı bir kişilik narazılıq aktsiyasını keçire. Sizikov soqurlaşqan soñ Smailov oña yardım etken edi.
Sizikov Lenin abidesine «Saqatlar Qırım musulmanlarınıñ tutulmasına qarşı çıqalar» yazuvlı şiarınen çıqtı. Bu aqta qırımtatar faali Nariman Celâl Facebookta haber etti.
«Men – birinci derece saqatı olam, soqurım, 2009 senesi iyünniñ 22-nde yol qazası neticesinde soqurlaştım. Bu dünyanı körmeyim. Bu qıyın vaqıtta ve bütün işlerimde yanımda olğanlardan biri Topçıköy (Dolinnoye) köyünde yaşağan Edem Nazimoviç Smailov oldı. Bıltır, mayısnıñ 21-nde, o ve daa bir din qardaşımız Server adaletsiz bir şekilde tutuldı. O vaqıttan berli menim ayatım zorlaştı», – dedi erkek.
O, «ondan ğayrı, oña yardım etken daa 60 kişi apiske alındı», dep qoştı.
Aprelniñ başında Aqmescit rayonınıñ Qulçuq (Rodnikovoye) köyünde yerli sakin Şevket Kelâmov Bağçasaraydaki «Hizb ut-Tahrir davası» boyunca tevqif etilgen kiyevi, qırımtatarı, musulman Edem Smailovnıñ apiske alınmasına qarşı bir kişilik narazılıq aktsiyasına çıqqan edi.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Fevralniñ 6-nda Rusiye kontrolindeki Aqmescitniñ Kiyev rayon mahkemesi Bağçasaraydaki ekinci «Hizb ut-Tahrir davasınıñ» mabüsleri Edem Smailov veServer Mustafayevniñ apiste qaluv müddetini 2019 senesi mayısnıñ 9-na qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
