Aqmescit rayonınıñ Qulçuq (Rodnikovoye) köyünde yerli sakin Şevket Kelâmov Bağçasaraydaki «Hizb ut-Tahrir davası» boyunca tevqif etilgen kiyevi, qırımtatarı, musulman Edem Smailovnıñ apiske alınmasına qarşı bir kişilik narazılıq aktsiyasına çıqtı.
Qırım.Aqiqat mühbiriniñ bildirgenine köre, Kelâmov «Kiyevim terrorist degil» yazuvlı şiarınen bir buçuq saatlıq narazılıq aktsiyasına çıqtı.
«Kezlev yolunda tura edim. Bazı aydavcılar qoltutqanını bildirip, yavaş kete, bazıları signal bere edi. Yarım saattan köy şurasınıñ reisi keldi. Yazuvlı şiarnı ne maqsadnen alıp çıqtım, dep soradı. Bir yıldan berli qızım aqaysız olğanını ayttım. Cuma künü mahkeme oldı. Apayı, ana-babası keldi, amma oturışuv qapalı oldı. O, ne içün ariza bermeysiñiz, dedi, misal olaraq, Ruslan Balbekke (Devlet Dumasınıñ deputatına – QA). Men akimiyet problemlerimizge diqqat ayırmay, dedim», – dep tarif etti Smailovnıñ soyu.
15 daqqa keçken soñ narazılıq bildirgenniñ yanına politsiya hadimleri keldi.
«Politsiya mayorı edi. Pasportımnı istedi, fotoresimini yaptı, meni kamerağa çıqardı, qayda yaşağanımnı soradı. Maşinağa keçmege rica etti, amma men razı olmadım. Belli bir vaqıttan soñ olar ketkenler», – dep qoştı Kelâmov.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Fevralniñ 6-nda Rusiye kontrolindeki Aqmescitniñ Kiyev rayon mahkemesi Bağçasaraydaki ekinci «Hizb ut-Tahrir davasınıñ» mabüsleri Edem Smailov ve Server Mustafayevniñ apiste qaluv müddetini 2019 senesi mayısnıñ 9-na qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
