Aqmescitte 5, 7 ve 17 marşrut trolleybuslarında naqıtsız ödev kirsetildi.
Qırım Naqliya nazirligi bildirgeni kibi, yol ücretini MİR, Visa ve MasterCard bank kartalarınen ve "Mir Pay" telefon qullanımınen tölemek mümkün.
"Endiden №5, №7 ve №17 marşrut trolleybuslarında yol ücretini naqıtsız tölemek mümkün. Bu marşrutlarda 42 trolleybus çalışa", - haber ettile müessisede.
Beyanatta bildirile ki, yaqın vaqıtta "Krımtrolleybus" müessiseniñ bütün naqliyatı naqıtsız ödev sistemsınen donatılacaq.
Aprelniñ 15-inde bildirile edi ki, koronavirus tarqalması telükesi sebebinden Aqmescit akimiyeti, şeerde künde 140-den ziyade degil içtimaiy naqliyat yürecegi aqqında qarar aldı, yani naqliyatnıñ 30%-ı.
Bundan evel Rusiye nezaretindeki Qırım Naqliyat Nazirligi "Krımtrolleybus" devlet şirketinen beraberlikte Aqmescit-Aluşta ve Aluşta-Yalta trolleybuslarnıñ sayısını arttıracağını bildirgen edi.
Daa evel Rusiye akimiyeti aprelniñ 2-sinden 14-ünece yañı naqliyat sıñırlavlarını tayin etti.
Aprelniñ 1-nden itibaren Qırımda cemaat naqliyatı tek saba ve aqşam cedvelge köre olacaq. Aqyar sakinlerine aprelniñ 1-nden itibaren acele vaziyet olmağanda evden çıqmaları yasaqlandı. Martnıñ 31-nde Aqyar akimiyeti şeer kirişlerinde blokpostlar qurdı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
