Advokat Emil Kurbedinov salı künü, iyülniñ 30-nda, Aqmescitniñ psihiatrik hastahanesinde tutulğan Qurmandaki «Hizb ut-Tahrir davasınıñ» mabüsi Rustem Emiruseinovnı ziyaret etti. Bu aqta Kurbedinov Facebookta yazdı.
Advokatnıñ aytqanına köre, Emiruseinov «bir şeyni şikâyet etmey». Bunıñnen beraber, Kurbedinov, bu tedbir insannıñ aq ve serbestligini boza, dep qayd etti.
«Sağlığı yerinde ve tutuv şaraitler de yahşı. Elbette, diger taraftan, qayd etilgen cinayetlerde qabaatlanğan şahıslarnen beraber tutulması, mahkeme qararı olmağanda devamlı psihiatrik tedqiqqe yatqızılması ve bu tedbirniñ diger hususiyetleri mahsus hızmetlerniñ ameliyatında telükeli bir meyil ola», – dep qayd etti o.
Kurbedinovnıñ qayd etkenine köre, o, apiske alınğan qırımtatarlarnıñ psihiatrik hastahanege avuştırılmasını sebepsiz dep saya, çünki bunıñ kibi psihiatrik tedqiqler belli bir cinayetlerde, hususan qatil ve subyancılarda yapıla.
Daa evel haber etilgeni kibi, iyülniñ 25-nde «Hizb ut-Tahrir davasınıñ» (Qurman gruppası) üç mabüsi Arsen Abhairov, Rustem Emiruseinov ve Eskender Abdulganiyev psihiatrik hastahanege yatqızıldı.
Rusiyeniñ Cezalarnı yerine ketirüv federal hızmeti «Hizb ut-Tahrir davası» mabüsleriniñ psihiatrik hastahanege yerleştirilmesine dair malümatnı izaatlamay.
Kreml kontrolindeki Aqmescitniñ Kiyev rayon mahkemesi Arsen Abhairov, Eskender Abdulganiyev ve Rustem Emiruseinovnıñ sıñırlav tedbirini sentâbrniñ 13-ne qadar uzattı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
