Cumaaqşamı künü, iyülniñ 25-nde, «Hizb ut-Tahrir davasınıñ» üç mabüsi (Qurman gruppası) psihiatrik hastahanege yatqızıldı. Bu aqta advokat Edem Semedlâyev Qırım.Aqiqat mühbirine bildirdi.
Onıñ aytqanına köre, o, «tahqiqat izolâtorına müvekkili Arsen Abhairovğa kirip olamadı» ve yaqında stantsionar ekspertiza qararı ile tanıştırılğanı içün psihiatrik hastahanege yol aldı.
Advokatnıñ bildirgenine köre, müvekkiliniñ «alı bir qarar», lâkin «psihiatrik hastahanege yerleştirilmesi onı aşalay», dep qayd ete. Semedlâyev bunı «cezalandırıcı psihiatriya şekli» olaraq tanıy.
«Balalar tahqiqatnen işbirligi yapmağa razı olmağanı içün, qabaatlanğan cinayetni işlegenini tanımağanı ve özüni terrorist dep saymağanı içün olar basqığa oğray, psihiatrik hastahanege yerleştirile», – dep qayd etti imayeci.
Advokatnıñ tarif etkenine köre, Arsen Abhairovdan ğayrı, psihiatrik hastahanede Rustem Emiruseinov ve Eskender Abdulganiyev buluna.
Rusiyeniñ Cezalarnı yerine ketirüv federal hızmeti «Hizb ut-Tahrir davası» mabüsleriniñ psihiatrik hastahanege yerleştirilmesine dair malümatnı izaatlamay.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
Kreml kontrolindeki Aqmescitniñ Kiyev rayon mahkemesi Arsen Abhairov, Eskender Abdulganiyev ve Rustem Emiruseinovnıñ sıñırlav tedbirini sentâbrniñ 13-ne qadar uzattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
