Rusiye nezaretindeki Aqmescitniñ Kiyev rayon mahkemesi, “Veciye Kaşka davası”nıñ iştirakçilerinde biri - yanvar 7-sinde hastaganege qoyulğan Asan Çapuhnıñ kelmemesi icün,mahkeme oturışını yanvar 24-üne avuştırdı.
Bu aqta Qırım.Aqiqat muhbiri bildirmekte.
Bu dava biyunca başqa qabaatlanğanlar - Bekir Degermenci, Ruslan Trubaç ve Kazim Ametovnıñ - advokatları da, olarnıñ sıñırlayıcı tedbirlerini ev tevfiqine deñiştirmege muracaat etti.
“Oturış endi ekinci sefen başqa künge keçirile. Asan Çapuh kerçekten hasta adam ve bizim müşterilerimiz de bu alğa qalmasın dep, sıñırlayıcı tedbirlerni ev tevfiqine deñiştirmege muracaat etem”, - dedi mahkemede advokat Edem Semedlâyev.
Mahkeme binası yanında “Veciye Kaşka davası”nıñ iştirakçilerine qol tutmaq içün 30-ğa yaqın faal toplandı.
Yanvarniñ 7-ne keçer gecesi qırımtatar faali Aqmescit hastahanelerinden birine yatqızıldı. Advokatı Ayder Azamatov, hastanı №6 Aqmescit şeer hastahanesinde ziyaret etkeninden soñ, qırımtatar faaliniñ alı bir qarar dep haber etti.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
