“Veciye Kaşka davası”nıñ mabüsi, qırımtatar faali Asan Çapuhnıñ alı bir qarar. Bu aqta onıñ advokatı Ayder Azamatov, hastanı №6 Aqmescit şeer hastahanesinde ziyaret etkeninden soñ haber etti.
Advokatnıñ aytqanına köre, Çapuhnıñ acele hastahanege qoyulması keskin gastrit tutuvı sebebinden kerek oldı. O ekimlerniñ nezareti astında 10 kün devmında bulunacaq.
“O özüni yaramay duyğanınıñ sebebi, Asan Çapuh SİZOdan çıqqan soñ, oña yazdırılğan ilâclarnı içkeni sebebinden, peyda olğan gastrit hastalığı.Şimdi o özüni yahşıca duya, tamızğı tübünde yata, eki kün bir şey aşamadı, qattı diyetağa riayet ete”, - dep ikâye etti azamatov.
Bundan ğayrı, Aqmescitniñ Kiyev rayonı mahkemesinde yarınğa tayin etilgen mahkeme oturışı, Çapuhnıñ sağlıq alı sebebinden başqa künge avuştırılacaq dep belley.
Yanvarniñ 7-ne keçer gecesi qırımtatar faali Aqmescit hastahanelerinden birine yatqızıldı.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
