Aqmescit SİZOsında apiste yatqan Aqmescitteki ekinci «Hizb ut-Tahrir davasınıñ» mabüsi Bilâl Adilovnıñ COVID-19 diagnozı tasdıqlandı. Bu aqta advokat Ayder Azamatov «Qırım birdemligine» bildirdi.
«SİZO Adilovnıñ COVID-19 diagnozını tasdıqladı ve bunı köstergen vesiqa bar. Olarnen mahkemede ya da tahqiqat tedbirleri vaqtında alâqada olğan insanlar hasta olması mümkün edi degen ihtimal bar. Bu em imayecilerni, em qoranta azalarını qasevetlendire. Sıñırlav tedbiri deñiştirilsin dep, Adilovnıñ imayecileri kerekli tedbirler almalı», – dedi Azamatov.
Onıñ aytqanına köre, şu sebepten Adilov sıñırlav tedbiri uzatılacaq mahkeme oturışuvı ketirilmedi.
Azamatovnıñ qayd etkenine köre, Adilovnıñ SİZOda qalması ayatı içün telükeli ola bile.
«Añlağanıma köre, karantinde buluna. Andaki şaraitlerni bilmeymiz, amma tahqiqat izolâtorında insan içün uyğun şarait olmağanını yahşı bilemiz. İleride de tahqiqat izolâtorı şaraitlerinde bulunması tek sağlığı içün degil, ayatı, yaqındaki insanlarnıñ ayatı içün telükeli ola», – dep qoştı Ayder Azamatov.
Bilâl Adilov bulunğan SİZO hadimleri bir malümat bermey.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
