Qırımlı advokat Edem Semedlâyev Aqmescitteki vaqtınca tutuv izolâtorında bulunğan qırımtatar faallerini ziyaret etti. Olar noyabrniñ 23-nde vaqtınca tutuv izolâtorından çıqqan Semedlâyevni qarşılamağa kelgende tutuldı.
«Qırım birdemligi» cemaat birleşmesi Semedlâyevniñ aytqanlarına esaslanıp bildirgenine köre, faal Lenur Appazovnıñ alı bir qarar, anasına telefon etip oldı. Onı Smail Kurtbekovnen beraber tutalar.
Semedlâyev, bir kamerada tutulğan Simmar Ablâlimov ve Ruslan Azizovnen körüşti. Uquqçınıñ aytqanına köre, olar yollanılğanlarnı ala, amma limiti bite.
«Konvoycılar şaşa, balalarğa o qadar şey ketireler ve halq olarnı ne qadar tüşüne», – dep bildirdi advokat.
Semedlâyev Kemal Nemetullayev, jurnalist Vilen Temeryayev, Remzi Nemetullayev, Ernest Seytosmanov ile körüşti.
«Soñkisi, kamerada bulunğan başqa insannıñ aytqanına köre, fayda ketirmegen istinafqa çıqarılğan edi, imayecilerine haber etilmegeni içün olar yoq edi. Uquqçı ilerideki esnaslarda advokatlar olur, dep ümüt ete», – dep bildirdi «Qırım birdemligi».
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.