Oktâbrniñ 11-nde Qurmandaki "Hizb ut-Tahrir davasınıñ" ükmüne qarşı berilgen istinaf baqılması beklenilgen Aqmescitteki mahkeme binası ögünde Rusiye quvetçileri tarafından tutulğan qırımtatarlarnı polis bölüginde 14 saat tuttılar. Soñra, Dilâver Memetov ve Reşat Paralamovdan ğayrı er kesni yiberdiler. Bunı "Qırım birdemligine" advokat Lilâ Gemeci haber etti.
"Mahkeme binası ögüne kelip tutulğan diñleyicilerge nisbeten polis hadimleri protokol tizdi. Protokollar türlü edi – sanitar qaidelerini bozuv, naqliyatnıñ areketine keder etüv ve ilâhre. Protokollar bozulıp tizildi, çünki müşterilerimizge aqları añlatılmadı. Eki kişini muvaqqat tutuv izolâtorına alıp kettiler. Qalğanlarını mahkemede memuriy uquq bozuv davaları baqınlğance evlerine yiberdiler", – dedi Lilâ Gemeci.
Onıñ fikrinci, rus polisi bunı mahkeme oturışlarına kelip, semetdeşlrine destek bildirmege istegenlerni qorqutmaq içün yapa.
Mudafaa tarafı prokuraturağa ve Qırım boyunca Rusiye polisiniñ bölügine şikâyetler yollanğan.
Aqmescitteki Rusiye İç işler nazirligi idaresiniñ «Merkeziy» üçünci polis bölügi ögünde eñ az beş kişi tutuldı, olarğa qarşı Rusiye Memuriy uquq bozuvları kodeksiniñ 20.2 maddesiniñ 1-inci qısmına istinaden memuriy protokollar tizildi.
Daa evel berilgen malümatqa köre, Aqmescitte Qurmandaki «Hizb ut-Tahrir davasınıñ» ükmüne qarşı istinaf baqılacaq olğan mahkeme binası ögünde Rusiye quvetçileri 15 qırımtatarını tuttı.
Bundan evel mahkeme ögünde bir qaç insannıñ tutulğanı belli oldı.
Rusiye kontrolindeki Qırım uquq qoruyıcıları bugün Aqmescitte olğan kütleviy tutuvlar aqqında bildirmey ve tefsir etmey.
