Rusiye kontrolindeki Qırımnıñ Aqşeyh rayon mahkemesi bu rayonnıñ sakinini «Noman Çelebicihan qırımtatar göñülli batalyonında» iştirak etkeninde qabaatlap, 8 yıl koloniyada qalmasına üküm etti. Bu aqta Qırımdaki Rusiye FSBsiniñ matbuat hızmeti bildire.
«Mahkeme qırımlını cinayette qabaatlı tanıp, diger memlekette Rusiye menfaatlarına qarşı faaliyet köstergen qanunsız silâlı birleşmede iştirak etkeni içün 8 yıl koloniyada qalmasına üküm etti», – dep bildire FSB haberini akimiyetke qol tutqan «Krıminform» saytı.
Mahküm etilgen kişiniñ adı ve soyadı aydınlatılmay. Qayd etilgenine köre, er adam bu yıl fevral ayında tutuldı.
Hatırlatamız, 2020 senesi fevralniñ 4-nde Kyiv rayon mahkemesiniñ qararı esasında Aqmeçit rayonınıñ 55 yaşında sakini Nariman Mejmedinov tutulğan edi. Fevralniñ 17-nde tutulğanı belli oldı.
Tahqiqat versiyasına köre, qırımtatarı 2016 senesi yazda esas Ukrainağa ketip, «Çelebicihan qırımtatar göñülli batalyonına» kirdi. FSB malümatına köre, er adamğa qarşı Rusiye Ceza kodeksiniñ 208 maddesiniñ 2-nci qısmına (silâlı birleşmede iştirak etüv – QA) istinaden cinaiy dava açıldı.
«Asker» cemaat teşkilâtınıñ reisi Lenur İslâmovnıñ bildirgenine köre, Noman Çelebicihan «qırımtatar batalyonında» Qırımda Rusiye quvetçileri tarafından tutulıp apiske alınğan Aqmeçit rayonınıñ sakinini tanımaylar.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
