Link açıqlığı

Saatnıñ esas haberi

Aq qorçalayıcılar Rusiyeden Qarasuvbazardaki «Hizb ut-Tahrir davası» mabüslerini azat etmesini talap ete


Riza Ömerovnıñ ömür arqadaşı bir kişilik narazılıq aktsiyasında, 2020 senesi dekabrniñ 27-si
Riza Ömerovnıñ ömür arqadaşı bir kişilik narazılıq aktsiyasında, 2020 senesi dekabrniñ 27-si

Ukraina aq qorçalayıcı teşkilâtları Rusiyeden bütün siyasiy mabüslerni, hususan Qarasuvbazardaki «Hizb ut-Tahrir davasınıñ» mabüsleri Enver ve Riza Ömerovlar, Ayder Cepparovnı acele azat etmesini talap ete. Bu talap yanvarniñ 11-nde derc etildi. Şu künü bu dava boyunca mahkeme oturışuvı ötkerilmeli ve qırımlılar soñki sözüni aytmalı.

Aq qorçalayıcılar «qırımtatarlar, qırımlı musulmanlarnıñ taqiplerini, memuriy apis cezaları, cinaiy qabaatlav, mal-mülkniñ çekip alınması ve diger repressiyalarnı; Qırımda siyasiy sebepli taqipler içün Rusiyeniñ terror ile küreş qanunlarınıñ qullanıluvını toqtatmağa» talap ete.

Arizanı imzalağanlar: ZMINA insan aqları merkezi, Kreml siyasiy mabüsleriniñ soy-sopları birleşmesi, Vatandaş serbestlikleri merkezi, Krım-SOS, Qırım aq qorçalayıcı gruppası, İnsan aqları media teşebbüsi, Ukraina insan aqları Helsinki birligi.

Ayder Cepparov, Enver ve Riza Ömerovlarnıñ ükmü soñki sözlerinden soñ çıqarılacaqtır.

Qarasuvbazardaki «Hizb ut-Tahrir davasınıñ» mabüsleri soñki sözüni aytacaq Cenübiy okrugınıñ arbiy mahkemesi oturışuvı dekabrniñ 28-nde qadı Roman Saprunovnıñ hastalığı sebebinden lâğu etildi.

2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.

Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.

Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.

Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG