Link açıqlığı

Saatnıñ esas haberi

Qarasuvbazardaki «Hizb ut-Tahrir davasınıñ» mabüsleri Rusiye mahkemesinde soñki sözüni aytacaq – Çubarov


Bazarertesi künü, yanvarniñ 11-nde, Rostov-na-Donu (Rusiye) Cenübiy okrugınıñ arbiy mahkemesinde Qarasuvbazardaki «Hizb ut-Tahrir davası» boyunca soñki oturışuv olacaq. Ondan soñ qırımlı Enver ve Riza Ömerovlar, Ayder Cepparovnıñ ükümleri çıqarılacaq, dep bildirdi Qırımtatar Milliy Meclisiniñ reisi Refat Çubarov.

«Bugün ve, büyük ihtimalnen, kelecek bir qaç kün devamında «terror faaliyetini kerçekleştirgeninde» sebepsiz qabaatlanğan qırımtatarlar soñki sözü aytacaqtır, bundan soñ ükümleri çıqarılacaq», – dep yazdı o, Facebookta.
Çubarovnıñ qayd etkenine köre, qabaatlav qırımlılar içün umumen 50 yıl apis cezası berilmesini talap ete.

«Rusiye quvetçileri üç qırımtatarınıñ umumen 50 yıl sert rejimli koloniyada qalmasını talap ete, olarnıñ «qabaatı» topraqları, halqını sevmesi, ecdatlarınıñ dini olğan İslâm qanunlarına riayet etmesi ve Ukraina vatandaşları olıp qalmasıdır», – dep qayd ete o.

Çubarov, «Kreml reinelerini» azat etmege çağırdı.

Qırımda bu dava mabüslerine qol tutmaq içün fleşmob keçirile. 1000-den çoq kişi öz fotoresimlerini «Qırım birdemligi» cemaat birleşmesine yolladı.
Qarasuvbazardaki «Hizb ut-Tahrir davasınıñ» mabüsleri soñki sözüni aytacaq Cenübiy okrugınıñ arbiy mahkemesi oturışuvı dekabrniñ 28-nde qadı Roman Saprunovnıñ hastalığı sebebinden lâğu etildi.

2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.

Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.

Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.

Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG