Bir sıra aq qoruyıcı teşkilâtlar işğal etilgen Qırımda advokatlar Edem Semedlâyev, Nazim Şeyhmambetov, Ayder Azamatov ve Emine Avamilevnıñ tevqif etilmesine cevap berdi. Muvafıq kollektiv beyanat ZMINA aq qoruyıcı merkeziniñ saytında yayınlandı.
"Advokatlarnın tevqif etilmesi RF işğal etilgen Qırımda yañı basqı dalğasını başlağanına delâlet ete. Endiden işğalciler yalıñız fikir bildirüv, tınç toplaşuvlar, diniy faaliyet, cemaat faaliyeti, başqa fikirde oluv içün degil, em de siyasiy basqılarnıñ qurbanlarına uquqiy yardım köstergen advokatlarnı da taqip etip başladı. Bu halqara standartlarğa ve milliy qanunlarğa zıt kele", - dep yazıla beyanatta.
Aq qoruyıcılar çetel devletlerniñ ükümetlerini ve halqara teşkilâtlarını, şu cümleden Halqara Qırım platforması iştirakçilerini çağıralar:
- İşğal etilgen Qırımda advokatlarnıñ esassız tevqif etilmesine qarşı keskin narazılıq bildirmege;
- İşğal etilgen Qırımda insan aqlarınıñ bozuluvına alâqası olğanlarğa qarşı şahsiy sanktsiyalar qoymağa;
- Qırımda siyasiy basqılarnıñ qurbanlarına ve olarnıñ qorantalarına ertaraflı yardım köstermege;
- İşğal etilgen Qırımda insan aqlarınıñ bozuluvını, arbiy ve insanlıqqa qarşı cinayetlerni nezaret etmege ve vesiqalaştırmağa devam etmege;
- İşğal etilgen Qırımda arbiy cinayetlerniñ, insanlıqqa qarşı cinayetlerniñ ve insan aqlarınıñ bozuluvınıñ tahqiq etilmesinde Ukrayinağa yardım etmege;
- Qırımda ve Ukarayina qıtasında yañı canavarlıqlarğa yol bermemek içün Rusiyege qarşı diplomatik, sanktsiyalar ve diger tazyıqnı quvetleştirmege.
Bu beyanat "QırımSOS", Qırım aq qoruyıcı gruppası, Vatandaş azatlığı merkezi ve ZMINA aq qoruyıcı merkezi tarafından tizildi.
Mayısnıñ 27-nde Qırımda Rusiyeniñ nezaretinde olğan Aqmescitniñ Merkeziy rayon mahkemesi qırımlı advokat Nazim Şeyhmambetovğa sekiz kün memuriy apis cezasını berdi.
Davanıñ baqıluvında iştirak etmek içün mahkeme binasına kelgen advokatlar Ayder Azamatov ve Emine Avamileva Rusiye quvetçileri tarafından yaqalandı.
Tünevin Rusiye quvetçileri Aqmescitte mahkeme binası yanında advokat Edem Semedlâyevge uquqiy yardım köstergen advokat Nazim Şeyhmambetovnı yaqaladılar.
Rusiyeniñ Ekstremizm ile küreş merkeziniñ hadimleri Ruslan Şambazov ve Konstantin Urazov Aqmescitte advokat Edem Semedlâyevni tuttı. Rusiye uquq qoruyıcıları bu aqta açıq bir malümat bermedi.
Aqmescitte Rusiye uquq qoruyıcıları tarafından tutulğan qırımlı advokat Edem Semedlâyev Rusiye ordusını «itibardan tüşürgeninde» qabaatlandı. Facebook içtimaiy ağınıñ başqa bir qullanıcısı Rusiye Federatsiyasınıñ Ukrainada yapqanlarına dair paylaşuvında Semedlâyevni qayd etken eken.
Edem Semedlâyev Qırımda Rusiye Federatsiyası ordusınıñ Ukrainada yapqanlarını «itibardan tüşürgeni» içün 75 biñ ruble para cezasını aldı.
2021 senesi advokat Edem Semedlâyev Ekstremizm ile küreş merkeziniñ bölük yolbaşçısı Ruslan Şambazovnıñ talabına riayet etmeyip, ses qaydını toqtatmağanı ve ekstremist tatuları barmı-yoqmı teşkermek içün urbasını çıqarmaq talabına razı olmağanı içün Aqmescitteki Rusiye mahkemesi tarafından Rusiye Federatsiyasınıñ Memuriy bozuvlar kodeksiniñ 19.3 maddesine istinaden 12 künge apiske alındı ve 4 biñ ruble para cezasını aldı.
ABD OSCE missiyası Qırımdaki mustaqil advokatlarğa qarşı taqip siyasetini toqtatmağa çağırdı. Semedlâyevniñ apiske alınuvı Büyük Britaniya Ukraina elçihanesi ve Çeh Cumhuriyetiniñ elçihanesi takbih ettiler. Ukraina Tış işler nazirligi Edem Semedlâyevniñ apiske alınğanını «iş aqlarınıñ bozuluvı» ve «basqı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
