İşğal etilgen Qırımda siyasiy taqip qurbanlarınıñ ükümleriniñ umumiy müddeti 1147 yıl ve 2 ay oldı. Bunı "QırımSOS" aq qoruyıcı teşkilâtınıñ telilcisi Yevgen Yaroşenko haber etti.
"93 siyasiy motivli taqip qurbanı işğalci akimiyet tarafından kerçek apis cezasına mahküm etildi. Şimdi Qırımlı siyasiy mabüslerniñ ükümleriniñ umumiy müddeti 1147 yıl ve 2 ay oldı ve er artmağa devam ete", - dedi o.
"QırımSOS" aq qoruyıcı teşkilâtında hatırlatqanları kibi, avgustnıñ 25-nde Rusiyeniñ nezaretinde olğan Aqmescit şeeriniñ Kiyev rayon mahkeme qırımtatar Arsen İbraimovnı Noman Çelebicihan adına qırımtatar göñülli batalyonında dersiñ iştirak etkeni içün 10 yıl apis cezasına mahküm etti. Aq qoruyıcılarnıñ bildirgenine köre, Arsen İbraimov işkencege oğratılğan.
Qırımtatarı Arsen İbraimov 2022 senesi aprelniñ 6-nda Herson vilâyeti ve Qırım Muhtar Cumhuriyetiniñ memuriy sıñırında qanunsız şekilde tutuldı. Avgustnıñ 25-nde Rusiye kontrolindeki Aqmescitniñ Kiyev rayon mahkemesi Noman Çelebicihan qırımtatar batalyonında iştirak etkeninde qabaatlap üküm çıqardı. Arsen İbraimov faal degil edi, qırımtatar aktsiyalarında iştirak etmede ve qabaatlavlarnı red ete.
İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» «terrorist» tanıp, Rusiye Federatsiyasında yasaqladı.
Bundan evel işğal etilgen Qırımda qurucısı ATR telekanalınıñ baş müdiri Lenur İslâmov olğan «qırımtatar batalyonınıñ» azası olaraq bir qaç qırımtatarına qarşı qarar çıqarıldı. İslâmov Qırımda «blekautnı teşkil etkeninde» qabaatlanıp, ğıyabiy şekilde 18 yılğa ve 1 mlrd ruble para cezasına üküm etildi. İslâmovnıñ Qırım.Aqiqatqa bildirgenine köre, o, Avropa insan aqları mahkemesine qararnı şikâyet etecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
