Noman Çelebicihan batalyonı davası boyunca 10 yılğa üküm etilgen Arsen İbraimov işkencege oğratıldı. Bu aqta «KrımSOS» aq qorçalayıcı teşkilâtınıñ talilcisi Yevğen Yaroşenko bildirdi.
«KrımSOS» alğan malümatqa köre, qanunsız tutuvdan soñ Arsen İbraimovnıñ betinde ve bedeninde qızarıntılar qayd etildi. Bu Rusiye Federatsiyasınıñ FSB hadimleri tarafından sorğu vaqtında İbraimovnıñ «şaatlığını» almaq içün sert bir küç ve işkence qullanılğanını köstere», – dep tarif etti Yaroşenko.
Teşkilât qayd etkenine köre, mabüslerge yapılğanlar halqara uquq normalarını boza.
«Bundan ğayrı, Arsen İbraimovğa qargı yapılğanlar IV Jeneva şartnamesiniñ 147-nci maddesine, Jeneva şartnamelerine I Qoşma protokolnıñ 85-inci maddesine (5) ve Halqara cinaiy mahkemeniñ Roma nizamınıñ 8-inci maddesini (2)(a)(II) istinaden arbiy cinayet ola. Halqara uquq işkencelerni yasaq ete», – dep aytıla haberde.
Qırımtatarı Arsen İbraimov 2022 senesi aprelniñ 6-nda Herson vilâyeti ve Qırım Muhtar Cumhuriyetiniñ memuriy sıñırında qanunsız şekilde tutuldı. Avgustnıñ 25-nde Rusiye kontrolindeki Aqmescitniñ Kiyev rayon mahkemesi Noman Çelebicihan qırımtatar batalyonında iştirak etkeninde qabaatlap üküm çıqardı. Arsen İbraimov faal degil edi, qırımtatar aktsiyalarında iştirak etmede ve qabaatlavlarnı red ete.
İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» «terrorist» tanıp, Rusiye Federatsiyasında yasaqladı.
Bundan evel işğal etilgen Qırımda qurucısı ATR telekanalınıñ baş müdiri Lenur İslâmov olğan «qırımtatar batalyonınıñ» azası olaraq bir qaç qırımtatarına qarşı qarar çıqarıldı. İslâmov Qırımda «blekautnı teşkil etkeninde» qabaatlanıp, ğıyabiy şekilde 18 yılğa ve 1 mlrd ruble para cezasına üküm etildi. İslâmovnıñ Qırım.Aqiqatqa bildirgenine köre, o, Avropa insan aqları mahkemesine qararnı şikâyet etecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
