Ukraina aq qorçalayıcıları salı künü, yanvarniñ 28-nde, Aqmescitteki ekinci «Hizb ut-Tahrir davasınıñ» mabüsi Cemil Gafarovğa qoltutuv aktsiyasını başlata. Onıñ sağlıq vaziyeti Aqmescit SİZOsında fenalaştı.
«Vatandaş serbestligi merkeziniñ» yolbaşçısı Oleksandra Matviyçuknıñ yanvarniñ 27-nde Qırım.Aqiqatqa bildirgenine köre, aq qorçalayıcılar halqara teşkilâtlar ve lâqayt olmağan vatandaşları Gafarovnıñ azat etilmesine yardım etsin dep, çeşit memleketlerniñ ükümetlerine muracaat etmege niyetlene.
«Halqara teşkilâtlar ve demokratik memleketlerniñ ükümetleri resmiy ve resmiy olmağan kanallarnı qullansın, Gafarovnıñ davasını «yarıqlatsın» dep, olarğa muracaat etecekmiz ve endi muracaat etemiz. Olarnıñ Rusiyege basqı yapması içün ve onıñ eñ az ev apsine alınması içün. Onıñ alı kritik. İç bir emiyeti olmağan Rusiye aqqında ne aytsaq aytayıq, amma SİZOda insan ölümi oña kerekmey», – dep ayttı Matviyçuk.
Aqmescitteki ekinci «Hizb ut-Tahrir davasınıñ» mabüsi Cemil Gafarov oktâbrniñ 25-nden berli Aqmescit SİZOsında kerekli ilâclar almay, dep qayd etken edi advokat Refat Yahin. O, Aqmescit SİZOsına qarşı dava açtırdı. Faqat soñra izolâtor memuriyeti tibbiy tedqiqlerge yollamaq qararını resmiyleştirdi.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
2019 senesi martnıñ 27-nde Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal tutuldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
