Qırımdaki Rusiye uquq qoruyıcı organlarınıñ hadimleri Canköy sakini, aq qorçalayıcı Lutfiye Zudiyevağa «ekstremist faaliyeti qabul etilmeycegine» dair eki tenbi vesiqasını berdi. Bu aqta «Qırım birdemligi» haber ete.
«Politsiya hadimi, İç işler nazirliginiñ Canköydeki «Canköy» belediye bölüginiñ üyken leytenantı Sadovoy Vladislav, özüni öyle tanıttı, ve şahsiy malümatını ve köküs işaretindeki malümatnı yazıp aldım, çünki prokuratura ve politsiya areketlerini şikâyet etmege niyetlenem, eki tenbi vesiqasını ketirdi. Biri Canköy rayonlarara prokuraturasından, ekincisi – İç işler nazirliginiñ «Canköy» belediye bölüginden. Eki vesiqanıñ tenbileri aman-aman aynı», – dep bildirdi Zudiyeva.
Onıñ aytqanına köre, onı aktsiyalarda iştirak etmemesi içün tenbileyler, bu vesiqalarnı tizgen insanlarnıñ fikirince, mezkür aktsiyalar ekstremist ola, politsiyadan kelgen vesiqada anda patlayıcı maddeler, silâ, zeerli maddeler qullanıla bile, dep qayd etile.
«Bu tsinik bir şey, dört balam bar, yarımadada yaşağan balalar içün silâ ne qadar telükeli olğanını yahşı añlayım», – dep tarif etti Zudiyeva.
Onıñ aytqanına köre, «aktsiya iştirakçileriniñ içki içmesi ve qullana bilmesi mümkün olğanını oqumaq pek külünçli edi».
«Bu uquq qoruyıcı organlarınıñ işini köstere. Ekseriyeti diniy baqışlarından iç bir vaqıt içki içmegen qırımtatar musulmanlarına böyle tenbi vesiqalarını tüşünmeyip bereler. İçki qullanılğan iç bir aktsiyada iştirak etmediler», – dep tarif etti aq qorçalayıcı.
Daa evel Rusiye politsiyası Han sarayını qorçalağan qadın faalge tenbi vesiqasını berdi.
Bunıñ kibi tenbi vesiqaları diger qırımtatarlarğa da berildi. Olarnıñ arasında qırımtatar milliy areketiniñ faalleri, aq qorçalayıcılar ve «Qırım birdemliginiñ» jurnalistleri bar.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde kemirilecek edi.
Çubarov, «Qırım yürüşi» arfesinde Kreml qırımtatarlarnı qorquzmağa tırışacaq, dep inkâr etmey.
Martnıñ 31-nde berilgen malümatqa köre, koronavirus sebebinden aktsiya başqa vaqıtqa qaldırıldı.
Rusiye Tış işler nazirligi Qırımtatar Milliy Meclisi ilân etken «Qırım yürüşini» «provokatsiya» dep adlandırdı.
