Qırımnıñ Aqşeyh (Razdolnoye) rayonında mesken evniñ yanğınını söndürgende, eki elâk olğan adamnıñ - qadın ve balanıñ - cesetlerini taptılar. Bunı Qırım ve Aqyar boyunca Rusiye tahqiqat komiteti bildirdi.
"Bugün saat 4-te saba Aqşeyh qasabasınıñ Vostoçnaya soqağında mesken ev yanğanı aqqında beyan etildi. Yanğınnı söndürgende 30 yaşındaki qadın ve 2 yaşındaki oğlu ölü tapıldı. Meftanıñ aqayı hastahanede komada yata", - bildirdi müessiseniñ matbuat hızmeti.
Tahqiqat komitetiniñ malümatına köre, bir kün evel qadın ve olarnen yaşagan ağasınıñ arasında ev saipliginen bağlı qavğa çıqtı, neticede aqay evni yaqıp qaçtı.
"Onıñ cesedi evden uzaq degil bir yerde tapıldı, o özüni öldürdi", - qoştılar matbuat hızmetinde.
Martta Keriçte Kirova soqağındaki beş qatlı mesken evniñ ekinci qatında balkonda yanğın oldı, üç adam tahliye etildi.
Daa evel Aqmescitte mesken evdeki yanğında dört adam elâk oldı.
Qırımnıñ Seyitler (Nijnegorsk) rayonında Caytamğalı (Yemelyanovka) köyünde martnıñ 17-sinde şahsiy evde yanığn oldı, neticede bir aqay elâk oldı.
Fevralniñ 13-ünde gece Kefede Galereynaya soqağında yanğın oldı, onıñ sebebinden beş qatlı evniñ 15 sakinini tahliye ettiler.
