Appaz Kurtametniñ davası: dostuna ödünç içün 7 yıl apis cezası

Rusiyeniñ nezareti astında olğan Aqmescitniñ Kiyev rayon mahkemesinde, FSB tarafından "Qırım" göñülli batalyonına maliyeviy yardım köstergeni iddiası ile qabaatlanğan 20 yaşındaki qırımtatar Appaz Kurtametniñ cinayet davasınıñ baqıluvı yekünlendi.​

Aqmescit şeeriniñ Kiyev rayon mahkemesiniñ mahkemecisi Oksana Karçevskaya cinayet davası boyunca qarar çıqarıp, Appaz Kurtametni qabaatlı tanıdı ve 7 yıl apis cezasına mahküm etti. Birinci yılnı o sert rejim cezahanesinde keçirmek kerek olacaq. Üküm quvetini daa almadı. Advokat Refat Yunusov ükümni istinaf mahkemesinde temyiz etecegini bildirdi.

Evel Rusiyeniñ nezareti astında olğan Aqmescitniñ Kiyev rayon mahkemesiniñ prokurorı qırımtatar Appaz Kurtamet içün 10 yıl apis cezasını istegen edi.

Qırımtatar faali Elmaz Qırımlınıñ Facebookta yazğanına köre, Rusiye tahqiqatınıñ versiyasına köre, Kurtamet Appaznıñ daa soñra bilgenine köre, "Qırım" batalyonında hızmet etken bir dostuna 500 ğrıvnâ berdi. Refat Çubarovnıñ malümatına köre, 2022 senesi iyülniñ 23-nde Kurtamet Herson vilâyeti Geniçesk rayonındaki Novooleksiyıvka qasabasından işğal etilgen Qırımğa, soylarına ketti. O, Qırım ve Herson vilâyetiniñ memuriy sıñırındaki Rusiye keçiş noqtasına keldi. Kurtametniñ soy-soplarınen bağı üzülmedi. Bundan soñ Rusiye uquq qoruyıcıları tarafından tutuldı.

"Cemiyette birden telâş ve ümütsizlik çıqarmaq içün, er keske işğalge qarşı olması içün, tirenüv içün, blokada içün onlarnen insannı tutıp, silâlı müfrezelerge alâqadarlıq kibi ağır cinayetlerde qabaatlay ediler. Aynı zamanda olar atta öz qanunlarına riayet etmey ediler, adamlarnı tutıp esir etip, tuvğanlarına bir şey aytmay ediler", - dedi Çubarov.

2022 senesi oktâbrniñ 8-nece Appaz Kurtametniñ bulunğan yeri belli degil edi. Onıñ ana-babası oğlunı tapmağa tırışı ediler. Anası Ayşe Kurtamet Türkiye, Ukrayina ve Rusiye akimiyet organlarına muracaat etip, bu davada yardım etmelerini istegen edi. Evel Rusiye quvetçileri tarafından yaqalanğan babası Halil Kurtamet de oğlunı qıdıra edi. Appaz Kurtametniñ azat etilmesi içün küreşke Milliy Meclis reisi, millet vekilleri ve uquq qoruyıcılar da qoşuldı.

2022 senesi oktâbr ayında Rusiyeniñ nezareti astında olğan Aqmescitniñ Kiyev rayon mahkemesiniñ mahkemecisi Viktor Krapko Appaz Kurtamet içün apis tedbirini sayladı (208 maddeniñ 1-nci qısmında köz ögünde tutulğan cinayet). "Qırım esnası" saytınıñ haber etkeni kibi, dava boyunca mahkeme tahqiqatı 2023 senesi feralniñ 17-nde başalnğan ve dert mahkeme oturışı devamında baqılğan.

Qabaatlav tarafınıñ Appaz Kurtamet içün 10 apis cezasını istemesinden soñ anası Facebook saifesinde yazdı: "Menim oğlumnı terrorcılıq içün esassız 10 yıl api cezasına mahküm etecek olalar. Allah er kesniñ cezasını özü berir! Bekleñiz. Menim oğlum terrorcı degil, o qaraman. Birisini belâda asla qaldırmaz, hainlik de yapmaz. Mına tam bunıñ içün mahküm etile. O eñ yahşı oğul, dost, ağadır".

Munaqaşalar vaqtında qabaatlav tarafı Appaz Kurtametniñ "qabaatı bütünley isbatlanğan" dep bildirdi. Qabaatlav tarafınıñ versiyasına köre, o "Qırım" göñülli batalyonına para yollay edi ve diger silâlı müfrezelerni parnen temin etmek içün de aynı areketler etmege niyetlene edi.

Mudafaa tarafı mahkemeniñ diqqatını dava materiallarında eki yönelişte deliller olmağanına çekti. Birincide, "Qırım" batalyonı qanunsız silâlı müfrezeler cedvelinde olğanına tasdıq yoqtır. Ekincide, mahkemede Appaz Kurtametniñ motivi isbatlanmağan. Mudafaa tarafı mahkemeni cinayet tekrkibi olmağanı içün davanı qapatmağa ya da maddeni deñiştirip, azatlıqtan marum etme ile bağlı olmağan başqa sıñırlav tedbirini saylamağa çağırdı.

Aq qorçalayıcılarnıñ malümatına köre, Ukrayinağa qarşı büyük istilâ başlağanından işğal etilgen topraqlarda Rusiye uquq qoruyıcıları Ukrayina vatanperverleri, göñülli, cemaat faalleri, jurnalist, ATO/Birleşken quvetler teşkilâtınıñ veteranlarını sıq-sıq hırsızlap başladı. Çoqusı işğal etilgen Qırımğa çıqarıla ve SİZOğa qapatıla.

Sentâbrniñ 2-nde Aqmescitteki Rusiye mahkemesi, Ukrayina aq qorçalayıcılarınıñ malümatına köre, Rusiye arbiyleri işğa altındaki Herson vilâyetinde hırsızlağan qırımtatarı Ayder Umerovnı 5 yıl sert rejimli koloniyada qalmasına üküm etti.

Oktâbrniñ 17-nde belli olğanına köre, Qırımdaki Rusiye mahkemesi qırımtatarı Artur Memetşayevni 6,5 yılğa üküm etti, «Qırımtatar resurs merkezi» işğal etilgen Geniçeskte hırsızlağanını bildirdi.

Berilgen malümatqa köre, bu yıl iyün ayında Rusiye işğal etken Melitopolde tutulğan Ukrayina göñüllisi Yaroslav Juk Aqmescit SİZOsında tutula, onı «halqara terrorizmde» qabaatlaylar.

Bundan evel Rusiye kontrolindeki Qırım Yuqarı mahkemesi Rusiye ordusı işğal etilgen Hersonda tutqan Ukrayına vatandaşı, ATO veteranı Pavlo Zaporojetsni SİZOda qaldırdı.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.