(Başını mında oquñız)
Yanımda kitaplar bar edi, oqudım, soñ kamerada daa neler bar baqtım. Pikulniñ "Favorit. 3 cılt" taptım. Açtım, münderice: amma da! Qırımnıñ Rusiyege qoşuluvı 1783 senesi, Qırım içün Türkiye ile cenk, tam kerek şey! 2014 senesiniñ ilhaqını özüm bilem, közümnen kördim, 1783 senesi ilhaqı aqqında oquğan edim, amma daa bir kere oqup çıqsam zararı olmaz, dep tüşündim.
Esas personajlar Potömkin ve II Yekaterina. Tez oqudım, pek meraqlı edi, hulâsa - o zamandan berli bu memlekette iç bir şey deñişmedi. Bütün belâlarnıñ qabatı Avrpa, Ğarp ve musulmanlarda. Bunı halqqa böyle köstereler, halq ise, ükümranlarınıñ bütün qusurlarını ve cinayetlerini körip, bu zalımlarnı şerefley...
Bir qaç künden soñ advokatlar içün odalarğa çıqaralar. Bölükten hadim biznen subet keçirmek içün kelgen. Er şey er vaqıt kibi - bizni diqqatnen közeteler, din ve siyaset aqqında bir şey atmaq kerekmey. Bir köznen Refat Alimovnı kördim, o İnver Bekirovnen beraber kelgen. Olarnı da subetke davet etkenler. Daa "Ufa 20" davasınıñ mabüslerini kördim, selâmlaştım. Meni tez alıp kettiler, bizge öz ara laf etmek mümkün degil eken...
Bir aftadan soñ kene çağırdılar, amma bu sefer advokat Edem Semedlâyev kelgen. Laf etmege izin bermediler, 21 kün karantide oturmaq kerekim. Öyle olsa nege çıqardılar? Añlamadım. Edemni körip pek quvandım. Evden uzaq yerde böyle tanış ve tuvğan insannı körmek büyük quvançtır. Ufadaki SİZO-da bir ay oturdım, soñra etap başlandı. Refat Alimov ve İnver Bekirovnı kördim, quvandım. Amma İnverni neçündir keri alıp kettiler. Yer yoq, dediler. Ve o kelecek sefer ketecek eken. Tintüv, soñra "voronok"qa oturttılar.
Salavatqa keldik. Meni 2-nci tüzetüv cezahanesine yerleştirdiler, Refatnı ise 16-ncı tüzetüv cezahanesine alıp kettiler. Kene tintüv, şeylerimniñ yarısını tutıp aldılar, amamğa alıp kettiler, bergen urbaları ayaqqapları balaban. Karantinge qapattılar. 4,5 yıl SİZO-da keçirgen soñ, şarait "lüks".
Yuqlamağa yatım. Saba teşkerüv, foto çektiler, parmaqlarınıñ izini çıqarıp aldılar. Üyle vaqtında tışarığa çıqtım, skemlege oturdım, taze ava aldım. Ve "azatlıqnıñ qıymeti nedir?", dep tüşündim.
Azatlıq pek qıymetlidir! Amma sevimli adamlar, yahşı kelecek, ğaye içün onı feda da etmek mümkün.
Men siyasiy mabüs, ukrainim ve musulmanım. Emin oluñız ki, biz azat ve bahtlı olacaqmız, İnşa Allah!
Vadim Siruk, vatandaş jurnalisti, faal, aq qorçalayıcı teşkilâtlar tarafından siyasiy mabüs olaraq tanıldı
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.