Aqmescitteki «Hizb ut-Tahrir davasınıñ» 15 qırımtatar mabüsi Rusiyeden işğal etilgen Qırımğa avuştırıldı. Bu aqta «Qırım birdemligi» birleşmesi advokatlarnıñ malümatına esaslanıp bildire.
«Tahqiqat tedbirlerinde «ekinci Aqmescit gruppasınıñ» qabaatlılarını gizli şaat tanıy. Bazılarınıñ apis müddetlerini uzatuv mahkemeleri endi Qırımda keçti. Tahqiqat tedbirleri bitkeninen olarnı kene Rostov-na-Donuğa alıp ketecekler», – dep aytıla birleşmeniñ haberinde.
Rusiyeniñ Cezalarnı yerine ketirüv federal hızmeti qırımlılarnıñ avuştırılmasınen bağlı malümatnı resmiy şekilde tasdıqlamay.
Daa evel advokat Aleksey Ladin Qırım.Aqiqatqa izaat berip, Qırımdaki Rusiye FSBsiniñ tahqiqatı gizli şaatnıñ Aqmescitteki ekinci «Hizb ut-Tahrir davasınıñ» mabüslerini gizli şaat tarafından tanılmasını yañlış keçire, dep bildirgen edi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
