Rostov-na-Dognudaki (Rusiye) apishaneniñ hastahanesinde bulunğan Aqmescit «Hizb ut-Tahrir davası»nıñ mabüsi Cemil Gafarovnıñ sağlığı zayıflaşıp başladı.
Bunıñ aqqında Gafarovnıñ advokatı Rifat Yahin Facebook saifesinde haber etti.
«Apishaneniñ hastahanesinde müşterim, suçsuz qırımtatar, 2-nci gruppa saqatı, 59 yaşındaki Cemil Gafarovnı yoqladım. Apishanede yaramay şarait ve onı tedaviylemegenleri aqqında aytıp berdi, anda onıñ sağlığı daa ziyade zayıflaştı», – dep yazdı Yahin.
Advokat dey ki, apishane hastahanesiniñ hadimleri Gafarovnıñ sağlıq alı aqqında kerçek malümatnı aytmay.
«Apishaneniñ hadimleri hastanıñ sağlığı aqqında malümatnı gizlemege devam eteler. Alı aqqında iç bir malümat, vesiqa bermeyip olar qanunnı boza. Hastahanenin müdiriyetine yazılı muracaat berdim ve memuriy dava açacağım aqqında haberdar ettim», – dep haber etti advokat.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
Hatırlatamız, martnıñ 15-nde Qırım.Aqiqat Gafarovnıñ mektübini elde etti, mabüs sağlıq vaziyeti fenalaşqanını yazğan edi.
Fevral ayında berilgen malümatqa köre, apiske alınğan qırımlı Gafarov Rostov-na-Donu SİZOsında kritik alda buluna.
Yahin, müvekkiliniñ ayaq podagrası başlandı ve hronik büyrek hastalığı ve Rusiye SİZOsınıñ memuriyeti tibbiy yardım köstermegeni içün sağlıq vaziyeti pek fenalaştı, dep bildirdi.
2020 senesi avgust ayında, Gafarov Aqmescit SİZOsında bulunğanda, Qırım ve Aqyardaki Cezalarnı yerine ketirüv federal hızmetiniñ idaresi ekim onıñ sağlıq vaziyetini taqip ete, dep bildirgen edi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
