Türkiyede Ankara şeerinde mayısnıñ 20-sinden 24-üne qadar Qırımtatar Yaşlıq Qurultayı keçirilecek. Bu aqta Qırım.Aqiqatqa teşkilcilerden birisi Fethi Kurtiy Şahin bildirdi.
“Eñ başından berli maqsadımız 15 farqlı memlektte yaşağan Qırımtatar yaşları arasında bağlarnı qaviyleştirmek ve bir muzakere platforması teşkil etmek edi. Bu seneki toplaşuvımızda konkret leyhalar boyunca çalışacaqmız. Böyleliknen Yaşlıq Qurultayını daa faal ve semereli bir alğa ketirmege isteymiz. Bu toplaşuv Qırımtatar yaşları içün halqara bir muzakere platforması olsun dep tırışamız. Qırımtatar yaşlıq teşkilâtlarından, diger teşkilatlarımıznıñ yaşlıq komissiyalarından ya da Qırımtatar yaşlarının faal bir şekilde çoqluq olıp işlegenleri teşkilatlardan vekillerni davet etemiz. Teşkilat olmağan yerlerden ise andaki faalerimiznen bağlanıp kelecek yaşlarımıznı tapamız. İnşallah kelecekte Milliy Qurultayımızda iştirak etecek ve milliy areketimizde faal çalışacaq yaşlar da aramızdan çıqacaqtır”, - dedi Şahin.
Qurultayda Ukraina, şu sıradan Qırım, Romaniya, Bulğaristan, Litvaniya, Poloniya, Türkiye ve başqa memleketlerden 100-den ziyade iştirakçi olacaq.
8-inci Qırımtatar Yaşlıq Qurultayı Ankarada 2016 senesi keçirildi.
