Türkiyeniñ paytahtı Ankarada 1944 senesi qırımtatar halqınıñ Qırımdan sürgün etilgeniniñ 75-inci yılına bağışlanğan resmiy devlet tedbiri keçirildi, dep haber ete Qırım.Aqiqat muhbiri.
Hatıra tedbiri çerçivesinde 1944 senesi qırımtatar sürgünligine bağışlanğan resim sergisi, sürgünlik şaatınıñ çıqışı, qırımtatar genotsidi aqqında vesiqalı film taqdimi, qırımtatar sanatkârlarınıñ çıqışları oldı.
Tedbirge Çetel türkler ve Aqraba toplulıqlar nazirliginiñ naziri Abdullah Eren, Qırımtatar Milliy Meclisi ve Dünya Qırımtatar Kongressiniñ reisi Refat Çubarov, Ukraina informatsion siyaseti naziriniñ birinci muavini Emine Ceppar, Türkiye medeniyet ve turizm naziriniñ muavini Serdar Çam, Qırımtatar Milliy Meclisiniñ reis muavini Nariman Celâl, Qırımtatar Milliy Meclisiniñ azası Gayana Yüksel ve Ukrainanıñ Türkiye Vekâletli elçisi Andriy Sıbiğa teşrif buyurdı.
Merasim Türkiye Cumhuriyeti Çetel türkler ve Aqraba toplulıqlar nazirliginiñ Qırımtatar Medeniyet ve Yardımlaşma Dernegi ile işbirliginde yapıldı.
Mayısnıñ 18-nde Ankarada qırımtatar sürgünliginiñ 75-inci yılına bağışlanğan hatıra mitingi keçirildi.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
