Oksana Novikova ve ailesi 2014 senesi Aqmescitten Lvivge köçmege mecbur oldı. O, Rusiye bayrağı altında yaşap olamaycağı içün ketkenini ayta. "Qırımdaki rus askerleriniñ közleri cam kibi edi. Bu pek qorqunçlı edi", - dep hatırlay o.
Fevralniñ 24-nde Rusiyeniñ Ukrayinağa keniş mıqyaslı istilâsından soñ Oksananıñ Qırımda yaşağan dostlarından iç biri oña yazmadı. Anası ile ise Rusiye propagandası sebebeinden qonuşuvnı toqtattı. Qırımdan köçip kelgen qadın, büyük cenk onıñ içün beklenilmegen bir şey olmağanını ayta. Oksana, ukrayinler öz toprağını qorumaq kerek olğanını añlağanları içün quvana. Onıñ sözlerine köre, başqa yol yoq.
Oksana şahsiy faciası ve başına kelgen qayğuruvlar, göñüllilik, Lvivde "Qırımlı perepiçka" ve Yaltada furun haneniñ açıluvı aqqında aytıp bere.
Lvivge köçüv
Menim içün bu cenk yañı bir şey degil
– Qırımnıñ işğali vaqtında ilk fikir - men bundan soñ olacaq adiselerde bir saniye bile iştirak etmege istemegenim edi. Sekiz yıl evel, Lvivge köçkenimiz zaman, bizden "Ne içün Lviv?", dep soray ediler. Moskallerden uzaqça, dey edim men. Özüniñ yanında bu adamlarnı - Rusiye arbiylerini köresiñ, közleri cam kibi ve adını bile soramayıp, öldüreceklerni añlaysıñ. Olarğa episi bir. Ve bu qorqunçlı edi. Menim içün bu cenk yañı bir şey degil. Yazıq ki, amma yıllar içinde bütün yüz bergen vaqialar beklenilgen edi. Tarihımız endi 300 yıldan berli böyledir. Yañı bir şey yoq.
Rusiye Lvivge de yetti
Çoq şükür epimiz qoşuldıq, ve bu bizim toprağımız ve biz onı qorçalamaq kerek olğanımıznı añladıq, çünki başqa çaremiz yoq
– Cenk başlamazdan bir qaç afta evel çetel jurnalistler anda-mında yürip başladılar. "Rusiye sizni taqip etemi?", dep sualler bere ediler. Men deyim: o zaman (Qırımnıñ Rusiye tarafından işğali vaqtında – KA) iç kimse küreşmeycegini añlay edim. Eñ kederlisi - cansızlıq közyaşları. Pek pek yaramay is. Men küreşmege alışqan adamım. Lviv soñuna qadar küreşecegini añlay edim. Çoq şükür, tek Lviv degil eken. Çoq şükür epimiz qoşuldıq, ve bu bizim toprağımız ve biz onı qorçalamaq kerek olğanımıznı añladıq, çünki başqa çaremiz yoq. Şimidi kerçekten saylav: biz ya da olar. Amma biz degende, tek Ukrayina degil. Ve bütün dünya şimdi bunı añladı.
Tuvğanlar ve dostlar
–Bu qadar ağır ola bilecegine inanmadım. Sekiz yıl evel ketkenimizde olar (Oksanananıñ ana-babası - muar.) Rusiye televizionını baqmay ediler. Ne içün men ketkenimni añlamay ediler, çünki olar içün er şeyni taşlap ketmek nonsenstir. Bu vaqıt türlü şeyler oldı. Televizordan olmaycaq şeyler baqalar. Belli bir müddet devamında bazı mevzularda qonuşmaymız. Olar babamnen mında kelgen ediler, mında kimse birisini kesmegenini öz közünen körgen ediler. Anda televizordan kösterilgeni aqılğa sığmaycaq şeylerdir. Fevralniñ 24-nden soñ o (Oksananaıñ anası - muar.) bir qaç kün susıp oturdı. Yanvar ayında telefon etip ayttı: sizge o qadar silâ berdiler, kelip bizni atacaqsız? Men anama: Ne deysiñ? Kim qayda kelecek? Men anama yazdım: televizorıñ olğance, qızıñ yoq. O malümatnı iç qabul etmey. Menim adekvat dostlarım bar, amma şimdi olar episi susıp oturalar. Anda kerçekten basqılar, olar qorqalar. Çoqusı Qırımdan ketti, çoqusı ne olacağını bekley.
Göñüllilik
– İş adamları daima birinci olmaq kerekler, nümüne olmaq ve yardım etmek bu normal bir şeydir. Men cebede degilim, aqayım yaşlı ve cebede ondan fayda olmaz, amma qolumızdan kelgenini yapmağa çaremiz bar. Bazılarınıñ imkânları bar, amma bir şey yapmaylar, bazıları aksine. Adamlarğa yardım etkenleri içün minnetdarım. Qaramanlıq tek cebede degil.
Lvivde biznes ve Yaltada yañı işhane
Lvivde üç işhanemiz bar. Nevbetteki Yaltada
– 2014 senesi bir işhaneden başlağan edik, amma o biznes kibi degil, ev kibi edi. Şimdi Lvivde üç işhanemiz bar. Biz balaban olmağan, amma iş içün yarağan öz binamıznı satın aldıq. Em Lvivde, em de başqa yerlerde inkişaf etmege planlarımız bar. Yaqında bir bilbord tiklep qoyacaqmız: "Lvivde üç işhanemiz bar. Nevbetteki Yaltada".
Eger evel Qırımnıñ qaytarılması istiqballeri çoq uzaq olğanını tüşüngen olsam, şimdi bu istiqballayer kerçek olğanını tüşünem. Ve o yaqın zaman olacağını tüşünem. Şunıñ içün anda kerçekten de açıluv plaşlaştıramız.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
