Amsterdam istinaf mahkemesi «Qırım Qara deñizdeki altın ada» sergisindeki eksponatlarnıñ qaytarılması ile bağlı dava üzre qarar çıqarılmasınıñ planlaştırırlğan tarihını oktâbrniñ 26-na deñiştirdi.
Bunıñ aqqında Ukraina TİN başınıñ birinci muavini Emine Ceppar Twitter saifesinde yazdı.
«İnanamız ki, mahkeme 2016 senesi Amsterdam bölge mahkemesiniñ Ukrainağa «skit altınınıñ» qaytarılması ile bağlı qararını tasdıqlar», – dep yazıla bildirmede.
Evel, Amsterdamnıñ istinaf mahkemesi skit altanı boyunca diñlevlerni sentâbrniñ 14-ne planlaştırğan edi.
Daa evel, ilhaq etilgen Qırımnıñ müzeyleri Amsterdam apellâtsiya mahkemesine, "Skit altını"nen bağlı Ukraina ve ilhaq etilgen Qırımnıñ müzeyleri arasında olğan dava boyunca qoşma delillerni bergeni haber etile edi.
İyülniñ 16-sında Amsterdamnıñ istinaf mahkemesi «skit altını davasınıñ» soñki qararını çıqarmadı. Mahkeme saytında derc etilgen muvaqqat qararğa köre, taraflarğa qoşma malümat bermeleri içün eki ay berildi.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
