Amsterdamnıñ istinaf mahkemesi «skit altını davasınıñ» soñki qararını çıqarmadı. Mahkeme saytında derc etilgen muvaqqat qararğa köre, taraflarğa qoşma malümat bermeleri içün eki ay berildi.
«Mahkeme davanı baqmağa devam etecek, soñki qarar 6-9 aydan soñ çıqarıla bile», – dep aytıla haberde.
Qayd etile ki, skit altını Amsterdamdaki Allard Pierson müzeyinde mahkemeniñ soñki qararı çıqarılğanına qadar qalacaq.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi.
Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
Amsterdamnıñ okrug mahkemesi 2016 senesi dekabrniñ 14-nde «Qırım: altın ve Qara deñiz sırları» sergisiniñ eksponatlarını Ukraina devletine qaytarmağa qarar aldı.
2017 senesi martnıñ 28-nde Amsterdamnıñ İstinaf mahkemesi Qırım müzeyleriniñ vekillerinden «skit altını» qararına qarşı temyiz arizasını aldı.
Qırım müzeyleri martnıñ 11-nde Amsterdam İstinaf mahkemesiniñ diñlevlerinen bağlı beyanatnı aydınlattı. Oña binaen, «ne Ukraina, ne Felemenk, ne de halqara uquq eksponatlarnı Kyivge bermek içün temel ola».
Ukraina informatsion siyaseti naziriniñ birinci muavini Emine Cepparnıñ bildirgenine köre, Qırım müzeyleriniñ temsilcileri Amsterdam İstinaf mahkemesiniñ oturışuvında iştirak etmegen edi.
