Aqayınıñ sağlığı aqqında Vladimirdeki apishanede Amet Suleymanovnı ziyaret etken advokat haber ete.
Suleymanov er kün daa yaramay olğanını ayttı. Yürek ağrısından ğayrı, qan basımı yüksek, nefes aluv qıyınlığından da çekişe.
Oña daa çilter zarınıñ angiopatiyası (çilter zarınıñ qan damarlarınıñ zararlanması, onıñ qan yetkizüvini boza) diagnozı qoyuldı, tedaviylenmese, körlikke ketire bile.
Amet Suleymanovnı Rusiye nezareti altında olğan Qırım sağlıq nazirligi yürek klapanını deñiştirmek içün ameliyatqa onı nevbetten çıqarğan haberi de açuvlandırdı. Qırımlı, ameliyat aqqında bilmek içün apishaneniñ tibbiy müdirine muracaat ete, amma aynı cevap ala – beklev cedvelinde yoq. Lilâ Lümanova qayd etti ki, şimdi Moskvadan ameliyat aqqında cevap bekley.
Suleymanov soy-soplarına telefon etmek içün muracaatta bulundı, amma şimdilik ruhset alamadı. Ailenen bağ tutmaq içün mektüpler şimdi bir yol ola.
Bu yıl mayıs ayında Amet Suleymanov gipertonik kriz keçirdi. Qan basımı yüksek olğanı içün burnu qanay, başı sıq-sıq aylana, nefesi zor ola. Hronik yürek problemleri qan damarlarına da zarar ketirdi – qırımtatarı bir ay devamında apayı yollağan ilâcnı almaq içün tırıştı.
Şimdi yürek ağrısı ve qan basımı içün ilâclar ala, amma ciger ve qannı şingenleştirgen ilâc almay. Ekimler oña şingenleştirgen ilâclar da bergen edi, amma soñra lâğu etkenler. Ekimler Suleymanovnıñ apayına ne içün ilâc bermegenlerini aytmadı.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi mart ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
