«Aluşta» yerli musulman din cemiyetiniñ reisi Ruslan Emirvaliyev, Rusiye kontrolindeki Aluşta şeer mahkemesi oña maküm etken, 1000 rublelik cöremeni töledi. Bunı Emirvaliyev "Qırım birdemligi"ne aytıp berdi.
"Vkontakte" içtimaiy ağındaki yazı içün ekstremizmde qabaatladılar, 1000 rublege cöremelediler. Adamlarğa yardım içün ve para cezası "Birlik cöremelerden qıymetli" 10 rublelik marafonından tölengeni içün teşekkürlerimni bildirmege isteyim. Biz büyük, bölünmez, yıqılmaz cemaatmız", - dedi Emirvaliyev.
Advokat Lilâ Gemeci bildirgenine köre, Ruslan Emirvaliyevni Rusiye Memuriy cinayetler kodeksiniñ 20.3 maddesine istinaden mesüliyetke çekmek içün VKontakte içtimaiy ağındaki saifesinde qoyulğan fotoresim sebep oldı.
Mayısnıñ 28-nde berilgen malümatqa köre, Ruslan Emirvaliyev prokuraturağa çağırılıp, İnternette ekstremist teşkilâtı timsalleriniñ propagandasında qabaatlandı.
2014 senesiniñ işğalinden soñ Qırımdaki Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
