Qırımda Ruslan Emirvaliyev prokuraturağa çağırılıp, İnternette ekstremist teşkilâtı timsalleriniñ propagandasında qabaatlandı.
«Qırım birdemligi» bildirgenine köre, adam «Aluşta» yerli musulman din cemiyetiniñ reisi vazifelerini eda etmekte. Faallerniñ malümatına köre, onı şeer prokuraturasına çağırıp, Rusiye Memuriy cinayetler kodeksiniñ 20.3 maddesiniñ 1-inci qısmına istinaden memuriy dava açılğanını haber etkenler.
«Aluşta şeeriniñ prokuraturasına İnternet ağınıñ qullanıluvınen federal qanun bozulğanına dair malümat keldi. Yapılğan teşkerüv sebebinden şeer prokurorınıñ üyken yardımcısı Didun M.İ.-ge kelip, teşkerüvnen bağlı malümat bermeñiz kerek», – dep aytıla Emirvaliyevge kelgen celpnamede. Onıñ kopiyası «Qırım birdemliginde» bar.
Prokurornıñ talapları yerine ketirilmese ve celp etilgen kişi kelmese, memuriy mesüliyetke çekilecek.
«Şimdi prokuratura mahkemege malümat bere, imaye tarafı ise malümat ögrenip ve fikrini şekillendirip, mahkeme esnasına azırlana. Emirvaliyevge qarşı Rusiye Memuriy cinayetler kodeksiniñ 20.3 maddesine istinaden dava açıldı», – dep bildirdi advokat Lilâ Gemeci.
Qırımnıñ Rusiye uquq qoruyıcılarınıñ açıq menbalarında bu dava aqqında malümat yoq.
2014 senesiniñ işğalinden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
