Rusiyeniñ Rostov-na-Donu Cenübiy okrugınıñ arbiy mahkemesi Aluşta "Hizb ut-Tahrir davası"nıñ iştirakçisiniñ qadını Elvira Kantemirovanıñ adına, "mahkemeciniñ ya ya icra memurınıñ mahkemelerniñ faaliyetiniñ tayin etilgen qaydlarğa uymaması sebebinden", memuriy protokolnı tizdi.
Bunı advokat Ayder Azamatov "Qırım birdemligi" birleşmesine bildirdi.
Qayd etilgeni kibi, icra memurı Kantemirovağa tibbiy maskası doğru kiyilmegeni sebebinden tenbiyeledi. Advokatnıñ aytqanına köre, qadın birden oña muracaat etilgenini añlamadı, amma soñra keç oldı, çünki onıñ adına memuriy protokolnı tizip başladılar.
"Onıñ maskası bar, sadece betinden tayıp ketti. Bunıñ sebebinden onıñ adına memuriy protokolnı tizdiler. Anda pek çoq adam bar edim, onıñ içün, oña muracaat etkenlerini birden añlamadı. İcra memurı birden o maskasız dep ayttı. Amma o özü bu qararnı aldı. İcra memurlarınıñ özleri de er vaqıt maska taqmay ve mahkeme qararlarını boza", - dedi Azamatov ve Elvina Kantemirovağa 500 rublelik cöreme berile bilecegini bildirdi.
Rusiyeniñ Rostov-na-Donu Cenübiy okrugınıñ arbiy mahkemesi Aluşta "Hizb ut-Tahrir davası"nıñ iştirakçilerine qırımtatarca laf etmege razı olmadı.
Daa evel iyülde Aluşta "Hizb ut-Tahrir davası" boyunca oturışta advokat Ayder Azamatov, müşterisiniñ qırımtatar tilinde tefsirleri sebebinden mahkemeci Roman Saprunovnen davalaştı.
O vaqıt mahkemeci, tercimannıñ yoq olmağanı içün mesuliyetli olmağanını bildirdi. Onıñ aytqanına köre, bu "yuqarıdaki mahkemeniñ qararı".
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
